Վերելակային տնտեսության պահպանման առումով ի՞նչ ծրագրեր կան, քանզի դա ամենահրատապ հարցերից մեկը պետք է լինի: Այսօր խորհրդարանում 2015 թվականի բյուջեի կատարողականի քննարկման ժամանակ Երեւանի փոխքաղաքապետ Կամո Արեյանին հարցրեց ՀՀԿ խմբակցության պատգամավոր Խոսրով Հարությունյանը:
Կամո Արեյանը մինչ այդ խոսել էր ճանապարհաշինության, ջրամատակարարման, նոր աղբավայրերի կառուցման մասին: Ասել էր, որ 2015-ին քաղաքապետարանն արել է իր առջեւ դրված խնդիրները:
Երեւանի փոխքաղաքապետը մանրամասնեց, որ վերելակային տնտեսության արդիականացման համար միջազգային տարբեր կազմակերպությունների հետ բանակցությունների մեջ ենք. «Լոկալ լուծումներ արվում են, այս տարվա բյուջեով 98 միլիոն տրամադրվել է անհետաձգելի միջամտությունների համար, մնացյալը`համատիրություններն են հոգում»:
Կարդացեք նաև
ՀՀԿ-ական պատգամավորները հնչեցրեցին ավանդական դարձած երկու հարց էլ`մետրոպոլիտենի նոր կայարանի կառուցման եւ Երեւանի կենտրոնը բեռնաթափող, մայրաքաղաքը շրջանցող ճանապարհների մասին: Մետրոպոլիտենի մեկ կայարանի կառուցումը արժե մետ 250 միլիոն դոլար ու ծրագրում առաջնայնության կարգով պահպանվում է դեռ խորհրդային տարիներից կիսատ մնացած Աջափնյակի կայարանի կառուցումը: Բայց դա դեռ ոչ տեսանելի ապագայում: Առայժմ, եղած կայարանների պահպանման հարցն է:
Մեկ ավանդույթ այս անգամ խախտվեց: Քննարկմանը ներկա չէր ընդդիմադիր պատգամավոր Նիկոլ Փաշինյանը եւ Կամո Արեյանի ու նրա ավանդական լեզվակռիվն այն մասին, թե ինչո՞ւ քաղաքապետ Տարոն Մարգարյանը չի բարեհաճել անձամբ ներկայանալ եւ պատասխանել պատգամավորների հարցերին, չկայացավ:
Այսօր լսվելու է նաեւ մարզպետարանների բյուջեների կատարողականը: Նիստին ընդդիմադիր որեւէ պատգամավոր չի մասնակցում:
Նելլի ԳՐԻԳՈՐՅԱՆ
