Այսօր կառավարության աշխատակազմի ղեկավար-նախարար Դավիթ Հարությունյանը լրագրողների հետ զրույցում հարցին՝ ի՞նչ է արվելու կրճատված ծառայողական մեքենաների հետ, աճուրդի՞ են դրանք հանվելու՝ պատասխանեց. «Դրանց հիմնական մասը կամ դուրս է գրվելու, կամ աճուրդի է հանվելու, կամ որպես մասեր են վաճառվելու: Դրանց մի զգալի մասն օգտագործման ենթակա չէ, ինչ վերաբերում է այն մեքենաներին, որոնք ֆինանսական հետեւանք են թողնում, այդ մեքենաների հետ կապված ունենք 2 հնարավոր մոտեցում: Մի մոտեցումն այն է, որ տեղափոխում ենք այն մարմիններ, որտեղ կա պակասորդ եւ որոնք պետք է նոր մեքենա գնեին: Մենք ասում ենք՝ եկեք նոր մեքենայի գումարը տնտեսենք, ձեզ տանք օգտագործված մեքենա:
Երկրորդ մոտեցումն այն է, որ մենք որեւէ մարմնի ֆինանսավորում ենք պայմանական 7 մեքենայի հաշվարկով, բայց մարմնում առկա է 9 մեքենա: Կախված, թե այդ մեքենաները երբ են սպառելու իրենց ռեսուրսները, մենք կարող ենք որոշում կայացնենք երկու մեքենան կոնսերվացնենք, թույլ չտանք դրա վրա որեւէ ծախս, բայց երբ այն մեքենաները շարքից դուրս գան, նոր մեքենա չգնեն, օգտագործեն դա»:
Երբ լրագրողները ճշտեցին՝ գույքահարկ է չէ՞ վճարվում այդ մեքենաների համար՝ Դավիթ Հարությունյանը պատասխանեց. «Ճիշտ է, գույքահարկ վճարվում է, բայց դա քաղաքականության հարց է: Երբ դու արդեն վերցրել ես ու 1 կիլոմետր քշել ես, դա շուկայում անհամեմատ ավելի էժան է, քան թե իրականում իր մաշվածությունը»:
Aravot.am-ի հարցին՝ դրամային արտահայտությամբ ինչքա՞ն խնայողություն է արվում այդ մեքենաների հետ կապված՝ նա պատասխանեց. «109 մեքենա, մոտավորապես յուրաքանչյուր մեքենայի վրա վառելիքի, գույքահարկի համար ծախսը 1,2 մլն դրամ է մոտավորապես տարեկան: Դուրս գրված մեքենաները, որոնք պիտանի են վաճառքի, վաճառվում են, իսկ որոնք պիտանի չեն եւ ավելի մեծ ծախս կլինի դրանք գնահատելը»:
Կարդացեք նաև
Նաիրա Զոհրաբյանն ասել էր, որ հիմա կառավարությունում մեծ աժիոտաժ է առաջացել, պաշտոնյաներն իրենք են ուզում գնել վաճառքի հանված մեքենաները: Դավիթ Հարությունյանն ասաց. «Եթե մենք որոշենք վաճառել մեքենաները, աճուրդի հանենք, դա պետք է լինի դասական աճուրդային տարբերակ, այսինքն, ով ցանկություն ունի՝ կգնի»:
Հռիփսիմե ՋԵԲԵՋՅԱՆ
