Այսօր աշխատանքային այցով Գյումրիում էր ՀՀ կրթության ու գիտության նախարար Լեւոն Մկրտչյանը: Նախարարը Օյունջյան վարժարանի դահլիճում հանդիպեց դպրոցի տնօրենների հետ՝ խոսելով կրթության ոլորտում առաջիկա 1-3 տարիների ընթացքում նախատեսված փոփոխությունների մասին: Նախարարն ասաց, որ իրենք մշակել ու կառավարությանն են փոխանցել կրթության զարգացման 10-ամյա ծրագիր: «Այս ծրագրում փորձել ենք տալ կրթության տեսլականը, այսինքն՝ ինքնանպատակ չէ կրթված մարդու ձեւավորումը, ինքնանպատակ չէ կրթություն ստանալը: Բազմիցս ասել եմ, Գյումրիում ուզում եմ մեկ անգամ շեշտել. կրթությունը միջոց է ինչ-որ նպատակ իրականացնելու համար, աշխարհում չկա միջազգային կրթություն, կան միջազգային քաղաքակրթական նորմեր, միջազգային չափանիշներ, կան ընդհանուր սկզբունքներ, բայց կրթությունը տվյալ ազգինն է: Կա անգլիական կրթություն, կա ռուսական, կա գերմանական, ֆրանսիական, մենք պարտավոր ենք ձեւավորել սեփականը»:
Լեւոն Մկրտչյանը կրթվելու հետ միասին շատ կարեւորեց դաստիարակությունը: «Բելգիայի նման երկրում շուրջ 300-400 մարդ իսլամական ծայրահեղականների մեջ կռվում է, նրանից մոտ 330-ը Բելգիայի դպրոցներն ավարտած երեխաներ են, մի մասն էլ սովորել են բելգիական համալսարաններում, ուրեմն ինչ-որ մի բան նրանց ձեւավորման գործընթացում բաց է մնացել: Այսինքն` կրթությունը չպիտի սպասարկի միայն աշխատաշուկային, կրթությունը պետք է սպասարկի ազատ տեղաշարժին, երկրի տնտեսական առաջընթացին, կրթությունը պետք է կարողանա նաեւ հասարակությանը ուղղորդել»,-ասաց նախարարը:
Լեւոն Մկրտչյանը խոսեց նաեւ ավագ դպրոցների ծրագրերում առկա խնդիրների մասին, անդրադարձավ նաեւ բնագիտական առարկաների՝ իրենց տեղը զիջելուն, վերջին զանգին թույլ տրվող ճոխություններին, հավաքվող գումարներին:
Կարդացեք նաև
Նախարարը նաեւ խոսեց «Բարձրագույն կրթության մասին» օրենքը հրապարակային քննարկման թեմա դարձնելու մասին, ասաց, որ այս ոլորտում պետք է արմատական փոփոխություններ կատարեն, որպեսզի սոցիալապես անապահովները կարողանան ստանալ բարձրագույն կրթություն: Այն մատչելի պետք է լինի հասարակության բոլոր շերտերի համար: Լեւոն Մկրտչյանը նշեց նաեւ, որ մագիստրատուրայի ծրագրերում կան նույն խնդիրները, ինչ ավագ դպրոցներում. նախարարի խոսքերով, չեն կարողանում մագիստրատուրան բերել, հասցնել կյանքի պայմաններին:
Հանդիպման ավարտից հետո լրագրողները Լեւոն Մկրտչյանից հետաքրքրեցին, թե ինչպե՞ս է արձագանքում «Թրասփերենսի ինթերնեյշընլ» հակակոռուպցիոն կենտրոնի կողմից իրեն հասցեագրված նամակին, որտեղ փաստերով խոսվում է Երեւանի դպրոցներում իրականացվող դրամահավաքության մասին, շեշտվում է անգամ հավաքվող գումարի չափը, նպատակը: «Ես մի քանի անգամ այս մասին հրապարակային խոսել եմ, եւ մենք աշխատում ենք այդ կազմակերպության հետ, պրոբլեմը մի քիչ դպրոցից դուրս է, ավելի հասարակության պրոբլեմն է: Երբ ես ասացի՝ ավելի համեստ նշել վերջին զանգը, կոչ արեցի հաշվի առնել այս վերջին իրադարձությունները, այդ օրը հիշարժան է, բայց պարտադիր չէ, որ շքեղ սեղաններով նշվի, մրցակցությամբ նշվի, դառնում է մի տեսակ մեր Նոր Տարվա սեղանների նման պրոբլեմ:
Եվ մենք Երեւանի քաղաքապետի հետ էլ խոսեցինք, որ այս տարի ավելի հանգիստ, լավ միջոցառումների ծրագիր իրականացնեն վերջին զանգի ժամանակ, մենք իսկապես կոչ անենք ծնողներին:
Եթե կոնկրետ այս դեպքում փաստերը հաստատվեն, մենք կհրավիրենք դպրոցի տնօրեններին: Խնդիրը հետեւյալն է, որ դրամահավաքը կատարվում է ծնողների միջոցով, մենք դպրոցների ներսում դրամահավաքի որեւէ գործընթաց չունենք, մենք պետք է դիմենք ծնողներին, եթե հավաքվում են ինչ-որ գումարներ, հաշվի առնեն, որ նույն դասարանում սովորում են ե՛ւ բարեկեցիկ, ե՛ւ ոչ բարեկեցիկ երեխաներ, եթե մեկի երեխան պետք է լավ նշի, դա չպիտի լինի մյուս երեխայի հաշվին, իսկ եթե դրամահավաք կա, որը հավաքվում է դպրոցի տնօրենի համար, մենք կպատժենք տնօրենին, բայց հիմնականում դրամահավաքը կատարվում է վերջին երեկո համար: Մենք հիմա պիտի ստուգենք, եթե գումարները հավաքել են ծնողների կողմից, նայենք տեսնենք ինչ վրա են այդ գումարները ծախսվել, եթե նկարահանումներ պիտի լինեն, լավ, բայց եթե պիտի գումար հավաքվի նվեր գնելու համար, դա իսկապես անընդունելի է»:
Կրթության նախարարն, անդրադառնալով կառավարության ներսում կատարվող կրճատումներին, ասաց, որ իրենց ապարատը մի քիչ ուռճացված է, եւ եթե վարչապետի որոշումը ստանան, կկարողանան իրականացնել: «Ես ինքս գտնում եմ, որ փոքրիկ հնարավորություններով կարող ենք լուծել մեծ խնդիրներ: Այստեղ կա նաեւ սոցիալական գործոնը, չեն գնա կրճատումները դեպի ուսուցչություն, բայց մենք խնդիր ունենք հատկապես գյուղական շրջաններում, երբ մեկին աշխատանքից ազատում ես, բերում է սոցիալական լարվածության եւ պետք է կարողանաս մարդուն ապահովել այլ աշխատանքով, եթե կրճատում պետք է կատարես, բավական բարդ խնդիր է»:
Նունե ԱՐԵՎՇԱՏՅԱՆ
