Պետեկամուտների կոմիտեի փոխնախագահ Արմեն Ալավերդյանն այսօր լրագրողների հետ զրույցում խոսելով ծառայողական մեքենաների կրճատման մասին՝ ասաց, որ դրանց արդյունքում որոշակի տնտեսում կանեն. «Ուղղակի պետք է որոշեն՝ պետական որ պաշտոնյաները կարող են օգտվել այդ ծառայողական մեքենաներից, որոնք չեն կարող»:
Թե նախկինում ինչու նման կրճատումներ չէին անում, միշտ էլ երկիրը վատ պայմաններում է եղել՝ Արմեն Ալավերդյանն ասաց, որ միշտ էլ այդ հարցը բարձրացվել է, բայց 2016–ին պետք է այդ ճանապարհով գնալ:
Հարցին՝ մինչեւ Հովիկ Աբրահամյանի խոսելը ապօրինի մենաշնորհներից, դուք ապօրինի մենաշնորհ ՀՀ-ում տեսնո՞ւմ էիք՝ նա պատասխանեց. «Ես ճիշտն ասած մենաշնորհ հասկանում եմ, ապօրինի մենաշնորհ չեմ տեսնում: Ապօրինի մենաշնորհը չեմ հասկանում որն է»:
Երբ լրագրողները ճշտեցին, որ ապօրինի մենաշնորհն այն է, որ արհեստական խոչընդոտներ են առաջացնում ՝ներմուծման, որի արդյունքում օրինակ, շաքարավազը մեկ հոգի է ներմուծում՝ նա վստահեցրեց, որ շաքարավազ մեծ քանակով ներկրում են նաեւ կոնֆետների, քաղցրավենիք արտադրությամբ զբաղվող տասնյակ կազմակերպություններ: Ինչ վերաբերում է ոչ արտադրական նպատակներով ներկրվող շաքարավազի շուկային, որի մատակարարը մեկ տնտեսվարող է՝ Արմեն Ալավերդյանն ասաց, որ «ինձ հետաքրքրում է նրա կողմից վճարվող հարկերի մեծությունը»:
Կարդացեք նաև
Հարցին՝ Դո՞ւք եք ասել մենաշնորհի մասին, թե՞ Հովիկ Աբրահամյանը այսպես ասած «օդից» է բռնել դա՝ նա պատասխանեց. «Կառավարությունը մեծ տեղեկատվական հոսքերի է տիրապետում, պետական տարբեր մարմիններ կարող են անհրաժեշտ տեղեկատվություն տրամադրել, այդ թվում՝ ՊԵԿ-ը կարող է վճարումների մասին լայնածավալ տեղեկատվություն տրամադրել: Վարչապետը մի աղբյուրից չի օգտվում»:
Հռիփսիմե ՋԵԲԵՋՅԱՆ
