«Երևան Պլազա»-ում այսօր` մայիսի 22–ին, կայացավ «ArmMod» Fashion նախագծի նորաձևության 2-րդ ցուցադրությունը` «Made in Armenia is the best» խորագրով: Ցուցադրությանը մասնակցեցին մի շարք նորաձևության տներ եւ խանութ–սրահներ` ներկայացնելով հայկական արտադրության երեկոյան, առօրյա, սպորտային հագուստներ, աքսեսուարներ: Հագուստները ներկայացրեցին մոդելներ Մարիկա Թունյանը, Լիլիթ Մարտիրոսյանը, Նարե Զաքարյանը, Մարի Մելյանը, Թերեզա Մարտիրոսյանը, Լիանա Թովմասյանը եւ այլք:
«Եթե նախորդ անգամ իրենց աշխատանքները ներկայացրեցին ուսանողները, ապա այս անգամ ներկայանում են արդեն գործող նորաձեւության տներ, հայկական բրենդներ եւ անհատ դիզայներներ: Ցուցադրության նպատակն է` մարդկանց ծանոթացնել հայկական արտադրության հագուստների հետ եւ ասել «ոչ»` թուրքական հագուստին»,-Aravot.am–ի հետ զրույցում ասաց «ArmMod» Fashion նախագծի ղեկավար Ռուբինա Գրիգորյանը:
Հարցին, թե հայկական հագուստը որքանով է մատչելի, նա պատասխանեց. «Ցուցադրությանը մասնակից մեր գործընկերներն առաջարկում են ոչ թանկ գներ, բացառությամբ` անհատական պատվերներով հագուստի գների: Հայկական նորաձեւոթյան ոլորտում առաջընթաց կա, մեր դիզայներները բավականին լավ են աշխատում, անհատական ցուցադրություններ կազմակերպում, մենք էլ փորձում ենք նրանց աջակցել: Ի դեպ, նախագծին մասնակցությունն անվճար է, մենք ամեն ինչ ապահովում ենք անվճար հիմունքներով»:
Ցուցադրության ընթացքում ներկայացվեցին նաեւ այնպիսի զգեստներ, որոնց վրա պատկերված են, օրինակ, Անահիտ դիցուհին, սարյանական կտավը, հայկական տարազի նախշեր, գորգագործության տարրեր: Մասնավորապես Loom Weaving բրենդի հագուստները գործվածքից են. դիզայներներին ոգեշնչել է հայկական գորգագործությունը: «Հագուստները մեքենագործ գործվածքների եւ ձեռքի աշխատանքների համադրություն են: Փորձում ենք շեշտը դնել գունային համադրության վրա: Ինչ վերաբերում է գներին, օգտագործում ենք բուրդ, բամբակ, թավիշ, ուստի գների շեմը բարձր է: Յուրաքանչյուր հագուստ մի առանձին աշխատանք է: Զգեստներն, օրինակ, կարելի է գնել 40-50.000 դրամով»,-մեզ հետ զրույցում ասաց բրենդի համահիմնադիրներից Էլեն Մանուկյանը:
Հավելենք, որ հաջորդ ցուցադրությունը նախատեսվում է հունիսին. կմասնակցեն Գեղարվեստի պետական ակադեմիայի ուսանողները` ցուցադրելով իրենց մոդելավորած հագուստները:
Լուիզա ՍՈՒՔԻԱՍՅԱՆ
