Մայիսի 21-ին «Թանգարանների գիշեր» միջոցառման շրջանակներում Կոտայքի մարզի Հրազդանի երկրագիտական թանգարանում կայացավ ձեռագործ գորգերի ցուցադրություն։
«Այսօր մենք տեսնում ենք՝ ինչպես են մեր հարևանները հայկական երգերից մինչև գորգերն իրենց վերագրում։ Ցուցահանդեսի նպատակն է, որ հրազդանցիները ծանոթանան և պահպանեն մեր գորգարվեստը»,- նշեց Հրազդանի գորգագործական արտադրամասի պետ Իսահակ Մելքոնյանը։
Այցելուները հնարավորություն ունեցան անձամբ հանդիպել գորգագործներին: Պարոն Մելքոնյանի խոսքով՝ Հրազդանի զբաղվածության տարածքային կենտրոնի հետ պայմանավորվածություն է ձեռք բերվել երկամսյա դասընթացներ անցկացնել աշխատանք փնտրող աղջիկների և կանանց համար, ինչից հետո առավել ընդունակներն աշխատանքային պայմանագիր են կնքում մեկ տարվա կտրվածքով։
Ներկայացվեցին Արցախում, Լոռու մարզում և Արևմտյան Հայաստանում ժամանակին տարածում գտած գորգերի վերամշակված տարբերակները, ինչպես նաև թեմատիկ աշխատանքներ՝ նվիրված Հայաստանի Առաջին Հանրապետության անկախության օրվան։
Կարդացեք նաև
Ցուցադրվեց «Մեր արտադրամասը» կարճամետրաժ ֆիլմը, որը պատմում է գորգի ստեղծման գործընթացի և մի շարք հայկական գորգերի՝ Վիշապագորգ, Արևագորգ, Քաշաթաղ, Պազիրիկ, Խանչալու և այլն, զարդանախշերի առաձնահատկությունների մասին։
Ցուցահանդեսը բաց կլինի մինչև հաջորդ շաբաթ։
Անի ԱՆՏՈՆՅԱՆ
