Ինչպես արդեն տեղեկացրել ենք, մայիսի 21-22-ը Ստեփանակերտում անցկացվում է «Հայկական քաղաքական կուսակցությունների երկրորդ ֆորումը»:
Ֆորումի մասին Aravot.am-ը զրուցեց Լեռնային Ղարաբաղի Հանրապետության Ազգային Ժողովի «Հայրենիք» խմբակցության նախագահ Արթուր Թովմասյանի հետ:
«Ես իմ ելույթում ասացի՝ աշխարհում չկա մի հայ, որ չերազի, որ մի օր Արցախը եւ Հայաստանը կվերամիավորվեն, բայց այս պահին բոլորս՝ ե՛ւ Հայաստանի Հանրապետության մեր հայրենակիցները, ե՛ւ սփյուռքահայերը պետք է հարգենք 1991 թվականի դեկտեմբերի 2-ի հռչակումը եւ 1991 թվականի դեկտեմբերի 10-ի հանրաքվեի արդյունքները, երբ ժողովրդի 99,999 տոկոսը այո է ասել անկախությանը: Այս պահին Արցախի բնականոն զարգացումը հնարավոր է անկախ պետականության շրջանակներում:
Իմ կարծիքով՝ Հայաստանի Հանրապետությունը պետք է Լեռնային Ղարաբաղի Հանրապետությունը ճանաչի լայնածավալ պատերազմական գործողությունների ընթացքում: Այդպես էր օրինակ՝ Հարավային Օսիայի եւ Աբխազիայի տարբերակով, երբ որ Վրաստանը լայնածավալ պատերազմ սկսեց Հարավային Օսիայի նկատմամբ: Այդ պատերազմի օրերին Ռուսաստանի Դաշնության կողմից եւ եւս մի քանի պետությունների կողմից այդ երկրների անկախությունները ճանաչվեցին»,- ասաց նա:
Կարդացեք նաև
Արթուր Թովմասյանը համարում է, որ Արցախի Հանրապետությունը ճանաչող նախագիծը Ազգային ժողով պետք է մտնի ոչ թե մեկ-երկու պատգամավորների նախաձեռնությամբ, այլ՝ բոլոր քաղաքական կուսակցությունների:
Ըստ նրա, գերխնդիր է, որ Արցախը մասնակցի բանակցություններին. «Պատերազմը եղել է Ղարաբաղի եւ Ադրբեջանի միջեւ: Ցավոք սրտի, հայ իրականության մեջ մարդիկ կան, որ մտածում են, որ դա Հայաստանի եւ Ադրբեջանի պատերազմն էր, այսինքն՝ղարաբաղա-ադրբեջանական պատերազմ էր, եւ բանակցային գործընթացին մենք պետք է մասնակցենք որպես պատերազմող կողմ: Քանի որ ամեն մի պատերազմ հակամարտություն է, իսկ ամեն մի հակամարտություն պատերազմ չէ: Հակամարտություն որպես այդպիսին Հայաստանի Հանրապետության եւ Ադրբեջանի միջեւ կա, բայց լայնածավալ պատերազմ չկա: Եվ եթե ԼՂՀ իշխանությունները չմասնակցեն բանակցային գործընթացին, այն հիմնարար փաստաթուղթը, որը պետք է ստորագրվի, ստորագրվի առանց Արցախի մասնակցության, լավագույն ցանկությունների դեպքում այդ թուղթը սեղանին է մնալու»:
Ամի ՉԻՉԱԿՅԱՆ
