Հայերիս քաջածանոթ, Թուրքիայի «Վաթան» կուսակցության նախագահ Դողու Փերինչեքը խոսել է 2016թ. հունիսի 2-ին Գերմանիայի խորհրդարանում քննարկվելիք Հայոց ցեղասպանության ճանաչման մասին նախագծի վերաբերյալ, հայտնում է թուրքական «Հաբերլեր» լրատվական գործակալությունը։
Դողու Փերինչեքն իր խոսքում նշել է, որ Գերմանիայի խորհրդարանը ոտնատակ է տալիս ՄԻԵԴ որոշումը և «1915թ. իրադարձությունները» ցեղասպանություն որակելը կարող է համարվել թշնամանք, որն ուղղված է թուրքերին. «Գերմանիայի խորհրդարանը, կամ ցանկացած այլ խորհրդարան, չի կարող ցեղասպանության համար մեղավոր լինելու վճիռ կայացնել»։
Չնայած դեռևս չի հրապարակվել Գերմանիայի խորհրդարան ներկայացված նախագծի ամբողջական տեքստը, բայց Փերինչեքը նշել է, որ իրեն հաջողվել է գաղտնազերծել այն։ Ըստ Փերինչեքի՝ նախագծի բովանդակությունը հետևյալն է՝
- Թուրքիան պետք է ճանաչի Հայոց ցեղասպանությունը, որը հաստատված է արխիվային փաստաթղթերով և ընդունված այլ պետությունների խորհրդարանների կողմից։
- Գերմանիան ընդունում է իր պատասխանտվությունը։ Գերմանական կայսրությունը, քաղաքական գործիչները, սպաները, տեղյակ են եղել, սակայն չեն կանխել հայերի հանդեպ տեղի ունեցածը, ինչի պատճառով էլ Գերմանիան ամոթ է զգում։
- Գերմանիայի նպատակն է ծառայել հայ-թուրքական հարաբերությունների կարգավորմանը։
Որոշումը՝
Կարդացեք նաև
- Հարթել Գերմանիայի թուրքերի և հայերի հարաբերությունները, ապահովել, որպեսզի Գերմանիայի մատաղ սերունդը դասեր քաղի անցյալի ցավերից։
- Հայոց ցեղասպանությունը պետք է ներառվի Գերմանիայի կրթական ծրագրում։
Փերինչեքը նշել է նաև, որ մայիսի 28-ին Գերմանիայի մայրաքաղաք Բեռլինում սպասվում է թուրքական համայնքի բողոքի հանրահավաքն ու երթը, որի ժամանակ Գերմանիայի թուրքերն իրենց բողոքը կհայտնեն եվրոպական այդ երկրի խորհրդարանում հայտնված Հայոց ցեղասպանության ճանաչման մասին նախագծի կապակցությամբ։
