Այս տարի ողջ աշխարհում նշվում է անվանի գրող, թատերագիր Վիլյամ Շեքսպիրի մահվան 400-րդ տարին: Տարելիցի առիթով Բրիտանական խորհրդի «Շեքսպիրն ապրում է» նախագծի շրջանակներում տարբեր երկրներում կազմակերպվում են մշակութային միջոցառումներ: Նախագծին միացել է նաև Հայաստանը՝ «Շեքսպիրն ապրում է մետրոյում» ծրագրով:
Ծրագրի շրջանակներում Երևանի մետրոպոլիտենի «Երիտասարդական» և «Հանրապետության հրապարակ» կայարաններում այսօր կազմակերպվել էր ընթերցում, ներկայացման դիտում:
Դերասան Արսեն Գրիգորյանն ընթերցեց հատվածներ Շեքսպիրի «Համլետ», «Մակբեթ», «Օթելլո» և «Լիր արքա» ստեղծագործություններից: Այնուհետև ներկաները դիտեցին հատվածներ “Shake Speare” ներկայացումից, որի պրեմիերան կայացել է դեռ փետրվարին «Փոքր թատրոնի» բեմում:
Կարդացեք նաև
“Shake Speare”-ը բեմադրել է թատրոնի գեղարվեստական ղեկավար, ռեժիսոր Վահան Բադալյանը: Լրագրողների հետ զրույցում Բադալյանն ընդգծեց այն հանգամանքը, որ չնայած Շեքսպիրի մահից հարյուրամյակներ են անցել, բայց նրա ստեղծագործություններն այսօր էլ են արդիական:
«Ներկայացում խաղալու համար մետրոպոլիտենը տարօրինակ վայր է: Նպատակ ունեինք Շեքսպիրի ստեղծագործությունը հնարավորինս մոտեցնել մարդկանց, մեր առօրյա կյանքի ընթացքին: Պարի լեզվով փորձել ենք մտորել այդ ողբերգությունների մասին»,- նշեց նա:
Սիրանուշ ՀԱՅՐԱՊԵՏՅԱՆ
