Ազգային ժողովում մայիսի 20-ին «Ճանապարհային երթեւեկության անվտանգության ապահովման օրենսդրական եւ իրավակիրառ հիմնախնդիրները» թեմայով լսումներ էին:
Լսումների ընթացքում արդարադատության նախարարի առաջին տեղակալ Արսեն Մկրտչյանը նկատեց, որ ներկա փուլում արդարադատության նախարարությունում լրամշակվում է վարչական իրավախախտումների վերաբերյալ նոր օրենսգրքի նախագիծը: Նա ներկայացրեց օրենսգրքի նախագծում առկա նոր մոտեցումները:
«Յուրաքանչյուր վարչական իրավախախտումների, իհարկե՛, ծանր իրավախախտումների մասին է խոսքը, տուգանային միավորների կիրառումը մեկ նպատակ է հետապնդում, որպեսզի շրջանառությունից դուրս գան այն անձինք, որոնք չունեն բարեխղճություն: Եվ միայն գումարը վճարելու միջոցով հնարավորություն չընձեռվի, անձին հնարավորություն չտրվի անընդհատ վարորդական վկայական ունենալ: Արդարացի հավասարակշռությունը պահպանելու համար, կարծում եմ, այս տուգանային միավորների չափի հարցը, թե ինչպիսի իրավախախտումների նկատմամբ պետք է կիրառվի, ինչքան պետք է կիրառվի, ինչքան ժամանակաշրջանում պետք է պահպանվեն, երբ են զրոյացվում, առաջիկայում այդ հարցերը մենք կներկայացնենք քննարկման»,- ասաց նա:
Նոր մոտեցումներից է՝ վարչական իրավախախտումների տեսանկարահանող եւ լուսանկարահանող սարքերի վարչական իրավախախտումներով ներկայացրած ակտերի ուժի մեջ մտնելու հարցը: Արսեն Մկրտչյանը նշեց, որ վարչական իրավախախտումների ակտը անմիջապես ուժի մեջ չի մտնում, եւ եթե անձը ակտը ստանալուց հետո բողոքարկում է, լսումներ են իրականացվում, իսկ եթե չի բողոքարկվում, ապա ակտը մտնում է ուժի մեջ. «Սա դրույթ է որով հնարավորություն է ստեղծվում անհամաձայնության դեպքում իրականացնել ամբողջական վարույթ եւ իրականացնել ամբողջական լսումները: Մյուս կողմից՝ ինքը արդարացի հավասարակշռություն է պահպանում պետության ծախսերի միջեւ, որպեսզի լրացուցիչ ավելորդ վարչական ծախսեր չլինեն»:
Կարդացեք նաև
Ամի ՉԻՉԱԿՅԱՆ
