«Բրենդներին երբեւէ նախապատվություն չեմ տվել, երբեւէ բրենդային ինչ-որ հագուստ չեմ կրել»,- Aravot.am-ի հետ զրույցում ասաց ՀՀԿ խմբակցության քարտուղար Գագիկ Մելիքյանը:
Հիշեցենք, որ սոցցանցերում քննարկվում է գեներալ Մանվել Գրիգորյանի թանկարժեք ժամացույցը, որը Apple Watch է՝ 12 հազար դոլար արժողությամբ:
Գագիկ Մելիքյանի խոսքերով՝ «Ես ընդհանրապես ժամացույց չեմ ունեցել, չեմ կրել, չեմ կրում, չեմ էլ կարողանում կրել: Իրոք»:
Կարդացեք նաև
Հաշվի առնելով, որ սոցցանցերում հաճախ քննարկվում են հատկապես ՀՀԿ կանանց հագուստները՝ «կոստյումչիկները», մենք ՀՀԿ պատգամավոր Ռուզաննա Մուրադյանից հետաքրքրվեցինք, թե ինքը ո՞ր բրենդներից է օգտվում: Նա պատասխանեց. «Բացարձակ ոչ մի բրենդի նախապատվություն չեմ տալիս: Լինի միայն ճաշակով եւ սազի ինձ: Կարող է ես էդպես նորաոճ չդիտվեմ, բայց ես այդպիսին եմ, բրենդներն ինձ համար երկրորդ տեղում են: Առաջինը՝ լինի ճաշակով, իմ ոճի մեջ եւ լինի ինձ սազող»:
ՀՀԿ պատգամավոր Կարինե Պողոսյանի խոսքերով՝ «Բրենդների հետեւից բոլորովին չեմ ընկնում: Եթե ինձ դուր է գալիս, եթե ինձ սազում է, ես գնում եմ՝ առանց նայելու, թե որ երկրի արտադրանք է եւ ինչ ֆիրմայի է»:
Նա ասաց, որ նախապատվելի բրենդներ չունի. «Բոլորովին»:
Պարզվում է՝ զարդերի դեպքում էլ Կարինե Պողոսյանն առանձնապես քմահաճ չէ. «Չունեմ էդպիսի զարդեր, անկեղծ ասած, բոլորովին: Ես սիրում եմ ամեն ինչը համեստ, ճաշակով, նախընտրությունը չեմ տալիս թանկարժեք իրերի»:
Մեր դիտարկմանը, որ սոցցանցերում հաճախ է քննարկվում պատգամավորների շքեղ հագուկապը, մեր աղքատ երկրում ձեր «կոստյումչիկները», տպավորությունն այնպիսին է, որ դուք միշտ թանկ եք հագնվում՝ Կարինե Պողոսյանը պատասխանեց. «Մենք բոլորս ձեր աչքի առաջ ենք: Չեմ ուզում նշեք նամանավանդ, այդպես շեշտեք՝ աղքատ երկրում: Փառք Աստծո, մեր երկիրը հնարավորինս գտնվում է այն մակարդակում, որ պետք չի ասել աղքատ երկրում: Ունեն հնարավորություն՝ ցանկացած ոք իրավունք ունի օգտվելու տարբեր բրենդային հագուստներից»:
Պատգամավորը վստահեցրեց, որ ինքը գնումներ անում է շատ սովորական խանութներից եւ շատ համեստ գնումներ է կատարում, ինտերնետ գնումներ էլ չի անում:
Հռիփսիմե ՋԵԲԵՋՅԱՆ
