Թուրքիայի սպորտի և երիտասարդության նախարար Աիքֆ Չաղաթայ Քըլըչը հարցազրույց է տվել Գերմանիայում լույս տեսնող պարբերականներից մեկին։ Այս մասին հաղորդում է թուրքական «Հաբերլեր» լրատվական գործակալությունը։
Հարցազրույցի ընթացքում թուրք նախարարը խոսել է իր երկրին վերաբերող բազմաթիվ թեմաների մասին։ Նախարարի կատարած անդրադարձների շարքում է եղել նաև 2016թ. հունիսի 2-ին Գերմանիայի խորհրդարանում քննարկվելիք Հայոց ցեղասպանության ճանաչման մասին նախագիծը։
Գերմանական պարբերականի լրագրողն այս թեմայով Քըլըչին է ուղղել հետևյալ հարցը. «Հունիսի սկզբին Գերմանիայի խորհրդարանը ցանկանում է ցեղասպանություն որակել 101 տարի առաջ հայերի հանդեպ կատարված կոտորածները։ Ի՞նչ կասեք այդ մասին»։
Հնչեցված հարցին ի պատասխան՝ Քըլըչն ասել է. «Խորհրդարանները չէ, որ պետք է պատմության վերաբերյալ վճիռներ կայացնեն։ Այսպես կոչված ցեղասպանությունը ոչ թե քաղաքական, այլ իրավական տերմին է։ Գերմանիան, որտեղ գրեթե 3 միլիոն թուրք է ապրում, առանձնահատուկ կարևորություն ունի Թուրքիայի համար։ Հույս ունենք, որ Գերմանիայի խորհրդարանը չի կրկնի այն սխալը, որը կատարել են այլ երկրների խորհրդարանները։ Պատմության միասնաբար ուսումնասիրությունը առաջին հերթին Թուրքիայի և Հայաստանի խնդիրն է։ Մենք առաջարկեցինք ընդհանուր հանձնաժողով ստեղծել՝ երկու երկրների արխիվների փաստերը ուսումնասիրելու համար, բայց հայկական կողմից, մինչև այժմ, պատասխան չի եկել»։
