ՌԴ Դաշնային խորհրդի միջազգային հարաբերությունների հանձնաժողովի նախագահի առաջին տեղակալ Վլադիմիր Ջաբարովը հայաստանցի լրագրողների հետ զրույցում անդրադառնալով ԼՂՀ հարցի կարգավորմանն՝ ասաց, որ իր համոզմամբ, շփման գծում խաղաղապահ ուժերի տեղակայումը պարտադիր է:
Ընդհանրապես, դաշնային խորհրդի պատգամավորը գտնում է, որ հարցի համապարփակ եւ ամբողջական լուծումը պետք է թողնվի հաջորդ սերունդներին, քանզի այս սերնդի ներկայացուցիչների համար բանակցելը բավական բարդ է`վերքերը թարմ են: Բայց որ հարցի խաղաղ կարգավորումն այլընտրանք չունի` Ջաբարովի համար միանշանակ է: Այս համատեքստում նա կարեւորում է Վիեննայում կայացած Սարգսյան-Ալիեւ հանդիպումը, այնտեղ ձեռք բերված պայմանավորվածություններն ու դրանց պարտադիր կատարումը:
ՌԴ ԱԳՆ ԱՊՀ-ի բաժնի տնօրեն Ալեքսեյ Պավլովսկին եւս հայաստանցի լրագրողների հետ հանդիպման ժամանակ կարեւորեց ԵԱՀԿ Մինսկի խմբի հարթակում ընթացող գործընթացը, համանախագահ երկրների միակարծությունն այդ հարցում`ԼՂՀ կոնֆլիկտի խաղաղ կարգավորման այլընտրանքի բացակայության եւ 1994 թվականի հրադադարի համաձայնագրի ուժի մեջ լինելու մասով: Մինսկի խմբի գործընթացին զուգահեռ, ըստ ռուսաստանցի չինովնիկի, ՌԴ-ն կշարունակի հավելյալ ջանքեր գործադրել հարցի խաղաղ կարգավորման ուղղությամբ, քանի որ ՌԴ-ն մյուս համանախագահների համեմատ հակամարտության կողմերի հետ բավական մտերմիկ հարաբերություններ ունի, ինչը ոչ ոք չի վիճարկում եւ վերապահումներ չեն արտահայտում, երբ ՌԴ-ն «սեփական քայլերն» է անում:
Հայաստանցի մի քանի լրագրողներ այս օրերին ՌԴ մայրաքաղաք Մոսկվայում են գտնվում ԶԼՄ-ների համագործակցության «Նոր հայացք» ծրագրի շրջանակներում:
Կարդացեք նաև
Ինչ վերաբերվում է խաղաղապահ ուժերի տեղակայմանը, ռուսաստանցի չինովնիկը նկատում է, որ այդ հարցը մշտապես եղել է բանակցային փաթեթներում, բայց այն արդիական կդառնա եթե հարցի կարգավորման գոնե ժամանակավորման տեսլական համաձայնեցվի:
ԼՂՀ-ի բանակցային սեղանի շուրջ վերադառնալու մասին էլ, ռուսաստանցի չինովնիկն ասաց. «Ես չեմ տեսել, որ մասնակիցներից որեւէ մեկը պաշտոնապես դնի այդ հարցը»:
Դիտարկումներին, որ քառօրյա պատերազմի օրերին պաշտոնական Երեւանն, ի դեմս նախագահ Սերժ Սարգսյանի, առաջ քաշեց այդ հարցը, նաեւ ԼՂՀ պաշտոնյաները քանիցս հայտարարեցին այդ մասին, Ալեքսեյ Պավլովսկին ասաց, որ տեղյակ է`հարցը քննարկվեց, բայց արդյոք Երեւանն այն պաշտոնապես առաջադրե՞ց ու նկատեց, որ համենայնդեպս Վիեննայի համաձայնություններում այդ հարցը տեղ չգտավ:
«Հասկանալի է, որ Երեւանը հավանաբար ցանկալի կհամարեր, դա ակնհայտ է, բայց ձեւակերպո՞ւմ է դա իբրեւ բանակցային պահանջ, մի փոքր այլ մակարդակ է»,- ասաց նա՝ հավելելով, որ ինքը բանակցային գործընթացի մանրամասներին չի տիրապետում, ուստի իր դիտարկումները կարող են նաեւ «աբստրակտ» բնույթ կրել:
Նելլի ԳՐԻԳՈՐՅԱՆ
