Ձուն հազարավոր տարիներ օգտագործվել է մարդկության կողմից՝ որպես անփոխարինելի կերակրատեսակ: Հավի ձուն պարունակում է օրգանիզմի համար օգտակար 12 վիտամիններ: Այն բավականաչափ հարուստ է հատկապես A, B1, B2, B9՝ ֆոլաթթու եւ E վիտամիններով, իսկ D վիտամինի բաղադրությամբ զիջում է միայն ձկան յուղին: Պարունակում է նաեւ կալցիում, ֆոսֆոր, յոդ, երկաթ, պղինձ ու կոբալտ: Ձվի կեղեւը հարուստ է կալցիումով, սպիտակուցը՝ մարդու օրգանիզմում չսինթեզվող ամինաթթուների պարունակությամբ բացարձակ չի զիջում մսին: Սպիտակուցը ամրացնում է մարդու իմունային համակարգը: Ձվի դեղնուցի հակաօքսիդանտ հատկություններ ունեցող A եւ E վիտամինները պաշտպանում են մարդու օրգանիզմն «ազատ ռադիկալների» հարձակումներից եւ նաեւ վաղաժամ ծերացումից:
Ձվի առավելագույն օգտակարությունը պահպանելու համար անհրաժեշտ է կիրառել մի շարք կանոններ.
Ձուն մինչեւ սառնարան դնելը, անպայման լվանալ կամ մաքրել մաքուր թաց կտորով:
Ձվի թարմությունը ստուգելու համար, այն ընկղմել աղաջրի մեջ, եթե սուզվի ջրի հատակը եւ գրավի հորիզոնական դիրք, ուրեմն թարմ է՝ 1-2 օրվա, իսկ եթե բութ ծայրը թեքվի դեպի վեր՝ 5-6 օրվա է:
Եթե ձուն աղաջրի մեջ ուղղահայաց դիրքով բարձրանա դեպի վեր, ուրեմն հին է:
Ձուն երկար կարելի է պահել, եթե նախապես սառեցնեք, ապա դնեք եռացրած արեւածաղկի ձեթի մեջ:
Կարդացեք նաև
Սառնարանի բացակայության դեպքում ձուն կարելի է պահել երկար ժամանակ, եթե պատեք կարագի բարակ շերտով կամ փաթաթեք անագաթղթի մեջ:
Ձուն սառնարանում կարելի է պահել 2 շաբաթից ոչ ավելի, իսկ եթե փաթաթեք թղթով եւ շաբաթը մեկ մի կողմից մյուսը շուռ տաք, ապա կարելի է պահել ավելի երկար:
Բութ ծայրը դեպի վեր թեքած ձուն ավելի երկար կդիմանա սառնարանում:
Սառնարանից հանած ձուն օգտագործելուց առաջ հարկավոր է որոշ ժամանակ թողնել սենյակի ջերմաստիճանում: Սառը սպիտակուցը շատ դժվարությամբ է հարվում: Սառնարանից հանելուց հետո անմիջապես չհարել, թողնել որոշ ժամանակ տաքանա:
Հում ձուն վնասակար է հատկապես երեխաների համար: Այն վատ է մարսվում եւ բացի դրանից, հում ձվի կեղեւների միջոցով մանրէներն ավելի հեշտությամբ են թափանցում օրգանիզմ:
Պինդ ձուն ավելի երկար կմնա սառնարանում, եթե այն պահեք սառը ջրով լի ամանի մեջ:
Եփած ձվի դեղնուցը որպեսզի կտրատելիս չփշրվի՝ կտրել սառը ջրում թաթախած դանակով:
Եռացող ջրում եփված ձվի դեղնուցը պինդ է լինում, իսկ սպիտակուցը՝ թույլ:
Ձվի դեղնուցի եւ սպիտակուցի միջնամասում որպեսզի մուգ շերտ չառաջանա, անհրաժեշտ է ձուն եփել 5 րոպեից ոչ ավելի:
Ձուն խաշելիս չի ճաքի, եթե ամանի հատակին շուռ տված ափսե դնեք: Որպեսզի ճաքած ձուն աղաջրում եփելիս դուրս չթափվի, հակառակ ծայրում ասեղով անցք բացեք:
Եփած ձուն հում ձվից կարելի է տարբերել այն պտտելով: Եփած ձուն շատ է պտտվում: Ձվի սպիտակուցը հարել ապակե ամանի մեջ: Որպեսզի սպիտակուցը լավ հարվի, ամանի պատերին կիսված կիտրոն քսել:
Եթե հարվող սպիտակուցին 1 ճաշի գդալ ջուր ավելացնեք, ապա այն ավելի շատ կփրփրի:
Ձվի դեղնուցը սառնարանում կարելի է պահել ջրով լի ամանի մեջ:
Ձվոտ ամանը սկզբում լվանալ սառը, ապա՝ տաք ջրով:
Ձվաձեղը պատրաստում են միայն մեղմ կրակի վրա եւ ավելի համեղ, ախորժաբեր կլինի, եթե վրան մանր կտրատած կանաչ սոխ ցանեք:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
19.05.2016
