Կենտրոնական բանկի նախագահ Արթուր Ջավադյանը մայիսի 19-ին Ազգային ժողովում ներկայացրեց Կենտրոնական բանկի 2016 թվականի դրամավարկային քաղաքականության ծրագիրը:
Նա նշեց, որ 2016 թվականին տնտեսական աճը դեռեւս կպահպանվի ցածր մակարդակում, այնուհետեւ կցուցաբերի աճողական վարքագիծ: 2017 թվականից սկսած տնտեսական աճի տեմպերը կարագանան՝ աստիճանաբար մոտենալով երկարաժամկետ հավասարակշիռ մակարդակին, իսկ գնաճը կշարունակի ավելանալ աստիճանաբար մոտենալով 4 տոկոս ցուցանիշին:
«Գնահատել ենք, որ 2016 թվականին կշարունակեն պահպանվել տնտեսության վրա հիմնական տնտեսական գործընկեր երկրների անբարենպաստ զարգացումների ազդեցությունը, հումքային, պարենային ապրանքների միջազգային շուկաներում շարունակվող գնանկումային միտումները»,- ասաց Արթուր Ջավադյանը:
Ըստ նրա, 2017 թվականի տնտեսական աճը կկազմի 3,5-4,5 տոկոս: Իսկ 2016 թվականի առաջին կիսամյակում կպահպանվի թույլ գնանկումային միջավայր, քանի որ թե՛ ներքին տնտեսությունից, թե՛ արտաքին հատվածից էական գնաճային ճնշումներ չեն ակնկալվում. «Մենք գնահատում ենք, որ տարեվերջին 12-ամսյա գնաճը 4 ± 1,5 տոկոս տատանումների թույլատրելի միջակայքի ստորին հատվածի շրջանակայքում»:
Կարդացեք նաև
Ամի ՉԻՉԱԿՅԱՆ
