Կենտրոնական բանկի նախագահ Արթուր Ջավադյանը մայիսի 19-ին Ազգային ժողովում անդրադարձավ Հայաստանի արտաքին պարտքին:
«Այս պահին արտաքին պարտքի ծավալները վտանգավոր չեն ե՛ւ օրենքներով, ե՛ւ միջազգային կառույցների եւ փորձագետների գնահատականով: Կարեւորը այդ վարկերի արդյունավետությունն է, եւ կարեւորը հետագայում մեր երկրի հնարավորությունն է սպասարկել այդ վարկերը»,- հայտարարեց նա:
Արթուր Ջավադյանը չի համարում, որ Հայաստանը այսօր ռիսկային գոտում է գտնվում եւ կունենա այլ խնդիրներ. «Իմ կարծիքով՝ այսօր լավագույն վարկային ձեւերը այսպես կոչված on landing ձեւերն են, որոնք հետո պետությունը վերցնում է եւ տրամադրում է համապատասխան ուրիշ մարմինների, որոնցից ակնկալում է հետ ստանալ այդ վարկերը եւ հետ տալ: Այդ գործընթացներն են ամենակարեւորը եւ այդ տիպի վարկեր մենք ունենք, որով կարելի է այդ բեռը դնել բիզնեսի վրա եւ հետո բիզնեսից հետ ստանալ»:
Ամի ՉԻՉԱԿՅԱՆ
