Եվրասիական տնտեսական միությունում ամենաակտիվ ոլորտը բանկայինն է: Այս մասին մայիսի 19-ին Ազգային ժողովի նիստի ընթացքում հայտարարեց Կենտրոնական բանկի նախագահ Արթուր Ջավադյանը:
Նա նշեց, որ ԵՏՄ-ից դուրս իրենց գործընկերների հետ արդեն ունեն համագործակցության տարբեր ձեւաչափեր. «Ամենակարեւորը՝ մենք նույն լեզվով ենք խոսում, նույն ստանդարտներն են բանկային համակարգում բոլոր երկրներում: Գրեթե բոլոր երկրներում բանկային համակարգում արդեն ներդրված են միջազգային հաշվապահական ստանդարտները, այդ առումով որեւէ խնդիր չկա, համագործակցությունը շատ լայն է: Մեր գործընկերները տարեկան 15 անգամ տարբեր առիթներով գալիս են Հայաստան՝ փորձի փոխանակման համար»:
Արթուր Ջավադյանի խոսքերով՝ որոշ ոլորտներում Հայաստանը առաջ է ԵՏՄ անդամակցող մյուս երկրներից, օրինակ` դրամավարկային քաղաքականությամբ, գնաճի նպատակադրման քաղաքականությամբ, բանկային ֆինանսական վերահսկողության ոլորտում. «Մի հարց կա, որի շուրջ բոլորս ունենք բացասական մոտեցում, դա միասնական արժույթի հարցն է: Այդ հարցի շուրջ բոլորս էլ ամեն ինչ հետաձգել ենք մինչեւ 2025 թվական: Մնացած հարցերով մեր համագործակցությունը շատ սերտ է»:
Ամի ՉԻՉԱԿՅԱՆ
