Ռուսաստանցի լրագրող, հեռուստատեսային եւ ռադիո հաղորդավար Վլադիմիր Սոլովյովը վստահեցնում է, որ ՌԴ փոխվարչապետ Դմիտրի Ռոգոզինը «ստացել» է իր հայտարարության համար:
Հիշեցնենք, ապրիլյան քառօրյա պատերազմի օրերին, անդրադառնալով Երեւանում եւ Բաքվում առաջացած անհանգստություններին, որ ՌԴ-ն տարիներ շարունակ զենք է վաճառել կողմերին, ՌԴ փոխվարչապետ Դմիտրի Ռոգոզինն ասել էր. «Այնտեղ դեմագոգիա է սկսվել ահավոր: Չեմ ուզում մատնացույց անել, բայց որոշ քաղաքացիներ իրենց լավ չպահեցին: Պատերազմը սառնասրտություն է պահանջում, ոչ թե ինչ-որ լղոզված քարոզչական փսլինքներ»: Ռոգոզինը նաեւ հայտարարել էր, որ ՌԴ-ն շարունակելու է զենքի վաճառքն իր «ռազմավարական գործընկեր» պետություններ Հայաստանին եւ Ադրբեջանին:
Այս թեման շոշափվեց նաեւ Ռուսաստանի պետական հեռուստա-ռադիո ընկերությունում`հայաստանցի լրագրողների հետ հանդիպման ժամանակ: Հայաստանցի մի քանի լրագրողներ այս օրերին ՌԴ մայրաքաղաք Մոսկվայում են գտնվում ԶԼՄ-ների համագործակցության «Նոր հայացք» ծրագրի շրջանակներում:
Կարդացեք նաև
Անդրադառնալով Ռոգոզինի հայտարարություններին, Սոլովյովն ասաց, որ դա խորությամբ չմտածված, պահի ազդեցության տակ արված հայտարարություն էր եւ վստահեցրեց, որ իր այդ հայտարարության համար Ռոգոզինը «ստացել» է: «Ուղղեք փողկապը»,- ըստ Սոլովյովի, Ռոգոզինին ասել է ՌԴ նախագահ Վլադիմիր Պուտինը:
Իսկ կողմերին զենք վաճառել ՌԴ-ն կշարունակի: Դա հաստատեց նաեւ ՌԴ վարչապետը:
Նելլի ԳՐԻԳՈՐՅԱՆ
