«Հարաբերական հանգիստ է: Վերջին ժամանակահատվածի հետ համեմատ այսօր ամենաքիչն են եղել կրակոցները»,- այսօր կառավարության նիստից առաջ լրագրողների հետ զրույցում ասաց պաշտպանության նախարար Սեյրան Օհանյանը:
Ըստ նրա` իրենք համագործակցում են Արցախի պաշտպանության բանակի հետ եւ, ստացված տեղեկատվության համաձայն, բոլոր ստորաբաժանումները վերահսկում են իրավիճակը եւ պատրաստ են իրենց առջեւ դրված պարտականությունները կատարել:
Այն հարցին, թե ինչպես կգնահատեք գեներալ Մանվել Գրիգորյանի պահվածքը, Սեյրան Օհանյանն ասաց, որ տեղյակ չէ Վահան Բադասյանի հայտարարությունից: Պարոն Օհանյանը նկատեց, որ որպես ԵԿՄ նախագահ Մանվել Գրիգորյանը «լուրջ աշխատանքներ է կատարում»:
Անդրադառնալով Վիեննայում Ադրբեջանի եւ Հայաստանի նախագահների ձեռք բերած պայմանավորվածությանը, Սեյրան Օհանյանն ասաց. «Բանակցային գործընթացում հաջողության հասնելու առաջին նախապայմանն արդեն իսկ համապատասխան իրավիճակ ստեղծելն է, վստահության մեխանիզմներ պետք է ստեղծել»:
Կարդացեք նաև
Ըստ նրա, վստահության մեխանիզմները երկու ուղղությամբ պետք է ձեւավորվեն: Առաջինն ըստ Սեյրան Օհանյանի՝ պետք է զերծ մնալ բոլոր տեսակի կրակոցներից, դիվերսիոն հարձակումներից եւ նաեւ միջազգային հետաքննության մեխանիզմներ իրականացնել: Նախարարի ներկայացմամբ, վերջին բանակցությունների ժամանակ կարծես թե այդ ամենի շուրջ պայմանավորվածությունը ձեռք է բերվել:
Ինչ վերաբերում է բանակում վերջերս մահացած զինծառայողի հոր հայտարարությանը, թե իր որդին, ոչ թե ինքնասպան է եղել, այլ սպանել են, որովհետեւ փորձել է կանխել բանակում բենզինի գողությունը, ապա պարոն Օհանյանը նշեց, որ հարուցված է քրեական գործ, որի շրջանակներում էլ իրավապահները կզբաղվեն եւ գնահատական կտան: Նա նշեց, որ չունի այդպիսի տեղեկություն, որ բենզինի գողության դեպք է եղել:
Լուսինե ԲՈՒԴԱՂՅԱՆ
== Սեյրան Օհանյանն ասաց, որ տեղյակ չէ Վահան Բադասյանի հայտարարությունից: ==
Ողջ հայ ժողովուրդը տեղյակ է, իսկ ահա, թիվ մեկ պատասխանատուն՝ տեղյակ չէ:
== Նա նշեց, որ չունի այդպիսի տեղեկություն, որ բենզինի գողության դեպք է եղել: ==
Սեյրան Օհանյան, եթե դու քեզ նախարար ես համարում, պետք է, որ զոհված շարքային Հովհաննես Պետրոսյանի և նրա հոր՝ Վաչիկ Պողոսյանի հեռախոսազրույցը արդեն տասն անգամ լսած լինեիր և շահագրգիռ հանձնարարականներ տված լինեիր, և ոչ թե կողմնակի անձի կեցվածք ընդունեիր:
https://www.aravot.am/2016/05/18/693495/
Դու և քեզ նմանները պնդում են, թե տասնամյակներ շարունակ բանակը թալանել են՝ տեղյակ չենք եղել, սակայն էս երկու ջայլամային պնդումները ցույց են տալիս, որ լավ էլ տեղյակ եք եղել…
Մենք էլ գիտենք՝ պաշտպանության նախարար ունենք, այնինչ ունենք ապականված իշխանական համակարգի մի պտուտակ…