«Վիեննայում Հայաստանի և Ադրբեջանի նախագահների հանդիպումը ընդհանրապես չպետք է որակվեն որպես բանակցություններ: Դրանք կարող են դիտվել խորհրդակցություն, մտքերի փոխանակում, բայց ոչ բանակցություն»,- նման կարծիք այսօր «Արմենպրես» ակումբում հայտնեց քաղաքագետ Ալեքսանդր Մանասյանը:
Նրա խոսքով, մենք գործ ունենք մի հակառակորդի հետ, որը վստահություն չի ներշնչում. « Ղարաբաղյան թեմայով չի եղել նույնիսկ մեկ պայմանավորվածություն, փաստաթուղթ, որն Ադրբեջանը պահպաներ, որին նա հետևեր: Չի եղել այդպիսի բան, բոլորը խախտել է»:
Անդրադառնալով Վիեննայում տեղի ունեցած Սարգսյան- Ալիեւ հանդիպման ընթացքում շփման գծում մոնիթորինգի մեխանիզմներ ներդնելու հարցի շուրջ պայմանավորվածությանը՝ պարոն Մանասյանը շարունակեց. «Իհարկե, այդ մեխանիզմների մասին խոսակցությունները դրական են և դեմ Ադրբեջանին: Բայց ասենք, թե ինչ-որ սարքեր են դրված, և Ադրբեջանի մտքով անցնում է պատերազմ սկսել, նա դա այդ սարքերին նայելո՞ւ է: Իհարկե, ոչ, մեզ ավելի խորքային մշակումներ են պետք, մեզ այլ ուղերձներ են պետք, մեզ ուրիշ ներքին կյանք է պետք, մենք բոլորս պետք է ապրենք որպես բանակ, զինվորի նման…ես մի բանաձև եմ հնչեցրել: Եթե մեր օլիգարխը կառուցում է դղյակ կամ եկեղեցի, նա պետք է մտածի այդ դղյակը պաշտպանող զինվորի մասին: Հակառակ դեպքում այդ դղյակն ո՞ւմ համար է կառուցում»:
Արփինե ՍԻՄՈՆՅԱՆ
