ՀԱԿ խմբակցության ղեկավար Լեւոն Զուրաբյանը մայիսի 18-ին իր հարցերն ուղղեց վարչապետ Հովիկ Աբրահամյանին:
Առաջին հարցը վերաբերվում էր այն հանգամանքին, որ Բագրատաշենի անցակետից դիզվառելիքով բեռնված մեքենաներին հետ են ուղարկում: «Ա1+»-ի հրապարակումներից պատգամավորը տեղեկացել է, որ վարչապետի զանգով այդ հարցը լուծվել է: Ըստ պատգամավորի, դա նշանակում է, որ գործում է կոռուպցիոն միջավայրը, որը խոչընդոտում է Հայաստան ազատ դիզվառելիքի ներկրմանը: Նա համարում է, որ պետք է ուսումնասիրել դա եւ հասկանալ, թե ով է պատասխանատու ստեղծված իրավիճակի համար: Լեւոն Զուրաբյանը խնդրեց ներկայացնել, թե ինչ միջոցառումներ են իրականացվել հարցը լուծելու համար:
Հովիկ Աբրահամյանը պատասխանեց, որ երեկ է ստացել նամակ եւ հանձնարարական է տվել, խնդիրն ուսումնասիրում են եւ առաջիկա օրերի ընթացքում կզեկուցեն, ինքն էլ որոշում կկայացնի: Ըստ նախնական տվյալների, որոշ նորմատիվների խախտում է գրանցվել: Նա հավելեց, որ չկա մենաշնորհ:
Լեւոն Զուրաբյանի հաջորդ հարցը վերաբերվում էր քաղաքական ուժերին ուղղված վարչապետի հրավերին՝ քննարկելու հակակոռուպցիոն միջոցառումները: ՀԱԿ-ը չէր ներկայացել այդ քննարկմանը, սակայն առաջարկություններ էր ներկայացրել, որոնցից մեկը հակամենաշնորհային քաղաքականությանն է վերաբերվում: Իշխանական կոալիցիան մերժել էր այդ առաջարկը, պատգամավորը հետաքրքրվեց, թե արդյոք հնարավո՞ր չէ վերանայել որոշումը եւ դնել այդ փաթեթը նորից քվեարկությամբ:
Կարդացեք նաև
Հովիկ Աբրահամյանը պատասխանեց, որ այսօր խորհրդակցություն են անցկացրել. «Ուզում եմ այս բարձր ամբիոնից հայտարարել, որ որեւէ մեկին չի սահմանափակվում, որեւէ ընկերության, որը ցանկություն ունի զբաղվել հեղուկ վառելիքի ներկրումով: Կարող են ներկրել եւ իրենք զբաղվեն այդ բիզնեսով: Եվ Եվրասիական տնտեսական միության կողմից ընդունվել է տեխնիկական կանոնակարգ, ուղղակի մեր պայմանը դա է, որ բոլոր չափորոշիչները պետք է համապատասխանեն այդ տեխնիկական կանոնակարգին: Դա միակ պայմանն է, այլ որեւէ պայման չի կարող գոյություն ունենալ: Եվ այդ հանձնարարականը արդեն ստացել են պատկան մարմինները, եւ ես հետեւելու եմ այդ գործընթացներին»:
Ամի ՉԻՉԱԿՅԱՆ
