«Վիեննայի հանդիպումն իր կայացման փաստով արդեն իսկ կարեւոր էր: Այն բերելու է շփման գծում լարվածության նվազմանը»,-վստահ է ՀԱԿ արտաքին հարաբերությունների հանձնաժողովի նախագահ Վլադիմիր Կարապետյանը:
«Ճիշտ է, հենց հանդիպման գիշերը լարվածությունը շարունակվեց, եւ զոհ ունեցանք, բայց կա ակնկալիք, որ կողմերը ձեռք են բերել պայմանավորվածություն` կրկին հանդիպելու հունիսին: Այդ հանդիպումն առարկայական դարձնելու համատեքստում լարվածությունը չի կարող շարունակվել»,-մայիսի 18-ին «Հայացք» մամուլի ակումբում ասաց Վլադիմիր Կարապետյանը:
Նրա խոսքով` որքան էլ ընդգծվի բանակցային գործընթացը սկսելու նախապայմանների մասին, ակնհայտ է այդ հարցում համանախագահների եւ կողմերի պատրաստակամությունը. «Հանդիպելու պատրաստակամությունը ցույց է տալիս, որ դիրքորոշումների մերձեցում կա: Կա փաստաթուղթ, որի շուրջ կողմերը պատրաստվում են բանակցել: Կարեւոր է, որ հայկական կողմը հանդես գա ամուր դիրքերից, եւ Մադրիդյան կամ այլ փաստաթղթերում առկա բացերը հաշվի առնելով` լիարժեք պաշտպանի մեր մոտեցումները»:
Կարապետյանի բնորոշմամբ` իշխանություններին ամենակոշտ կերպով քննադատողը ՀԱԿ-ն է, միեւնույն ժամանակ, այս փուլում կուսակցությունում գտնում են, որ կոշտ քննադատությունը շարունակելու ժամանակը չէ, քանի որ ՀՀ-ի շահերից է բխում բանակցություններին նպաստավոր դիրքերից ներկայանալը:
Կարդացեք նաև
Կարապետյանը կարծում է, որ ՀՀ նախագահն անպատճառ պետք է գնար Վիեննայի հանդիպմանը` հաշվի առնելով լարվածությունը սահմանին եւ այն հանգամանքը, որ դիվանագիտության շնորհիվ հնարավոր է մարդկային կյանքեր փրկել. «Գոնե այդ նպատակից ելնելով` պետք է ակտիվ լինենք բանակցային գործընթացում, կամակորությունն այստեղ տեղին չէ: Ինչ վերաբերում է նախապայմաններին, դրանք դնողը թող ինքն էլ բացատրի դրանք: Ինչո՞ւ են դրվում այդ նախապայմանները, որոնք չբավարարելու դեպքում հանդիպումներ չեն լինելու: Ինձ համար այդ հարցն անհասկանալի է: Իսկ իշխանությունների հարցադրումները ճիշտ են` շփման գծում պետք է իրականացվեն մոնիթորինգ եւ վերահսկողություն: Այդ դեպքում մեղադրանքները հասցեական կլինեն: Բայց դա դարձնել նախապայման, ինձ համար հասկանալի չէ: Խնդիրները պետք է բարձրաձայնել բանակցային սեղանի շուրջը: Դրա մի մասն էլ իրականացվեց Վիեննայում»:
Սերժ Սարգսյանի` քառօրյա պատերազմում 800 հեկտար տարածք կորցնելու մասին հայտարարության շուրջ Վլադիմիր Կարապետյանի կարծիքը` քիչ ուշ:
Լուիզա ՍՈՒՔԻԱՍՅԱՆ
