Ազգային ժողովում մայիսի 18-ին շարունակվում է քննարկվել Վերահսկիչ պալատի 2015 թվականի հաշվետվությունը:
ԱԺ պատգամավոր Թեւան Պողոսյանը նկատեց, որ Վերահսկիչ պալատի 2013 թվականի զեկույցը բաղկացած էր 61 էջից, 2014 թվականինը՝ 34 էջից եւ 2015 թվականինը՝ 25 էջից: Նա հետաքրքրվեց Վերահսկիչ պալատի նախագահից, թե ծավալների նվազումը ԱԺ հաստատած ծրագրի ռազմավարակա՞ն, թե՞ մարտավարական փոփոխություններով է պայմանավորված:
Իշխան Զաքարյանը պատասխանեց, որ Վերահսկիչ պալատի համար թիվ մեկ չափանիշը վերահսկողության ավարտից հետո կազմված ընթացիկ հաշվետվությունն է, որը իրենք տեղադրում են իրենց կայքէջում եւ նաեւ տարածում են. «Ես կարծում եմ, որ հաջորդ տարվա մեր հաշվետվությունը էլի պետք է նվազի, որովհետեւ մենք մոտենում ենք INTOSAI (Ֆինանսական վերահսկողության գերագույն ատյանների միջազգային կազմակերպություն) սկզբունքներին: Այդ սկզբունքները չեն պարտադրում եւ չեն ենթադրում եւ չեն ասում, որ տարվա ընթացքում ինչքան հաշվետվություններ եք ունեցել հավաքեք եւ դարձրեք տարեկան հաշվետվության մաս:
Այս տարվա ընթացիկ հաշվետվությունները 23-ն են, ընդհանուր թիվը՝ 1400 էջից ավել՝ չհաշված միջազգային արձանագրությունները, եթե դա էլ հաշվենք, կլինի 2000 էջից ավելի: Եթե մենք այդ ամբողջ փաթեթը դարձնենք տարեկան հաշվետվություն, պատկերացրեք, թե ինչ կստացվի»:
Կարդացեք նաև
Ամի ՉԻՉԱԿՅԱՆ
