Վրաստանի նախագահ Գեորգի Մարգվելաշվիլին խոսել է ռուս-վրացական հարաբերություններից՝ նշելով, որ Վրաստանը ՌԴ հետ պետք է վարի ռացիոնալ և հանգիստ երկխոսություն։ Այս մասին տեղեկացնում է Грузия Online լրատվականը։
Նախագահ Մարգվելաշվիլին նշել է, որ ռուս-վրացական հարաբերություններում առկա է երկու ճակատ՝ Վրաստանի ազգային շահերը և Ռուսաստանի ազգային շահերը, և հենց դրանցից ելնելով պետք է գործեն երկու պետությունները. «Մի կողմից առկա են Վրաստանի, մյուս կողմից՝ Ռուսաստանի շահերը և մենք պետք է խոսենք կոնկրետ հետաքրքրությունների մասին։ Այդ երկխոսությունում առկա է մեկ կարևոր նախապայման՝ Ռուսաստանը պետք է ճանաչի Վրաստանի տարածքային ամբողջականությունը»։
Ռուսաստանի Դաշնությունը չի կարող խուսափել փաստից, որ բռնազավթել է իր խաղաղ հարևան պետությանը. «Մեր դիրքորոշումը հստակ է և վճռական՝ Վրաստանի ոչ մի քաղաքացի, ոչ մի իշխանություն չի համաձայնվի բռնազավթմանը։ Սա էլ հենց նախապայմանն է։ Մենք թշնամական որևէ դիրքորոշում չունենք Ռուսաստանի հանդեպ և որոշակի ինչ-որ պահի մենք պետք է խոսենք ոչ թե քաղաքական, այլ ռացիոնալ հռետորաբանությամբ՝ ելնելով երկու երկրների պետական շահերից»։
