Վիեննայում ընթացող Սիրիային աջակցող միջազգային խմբի գագաթնաժողովի ընթացքում հստակորեն դրսևորվել է ռուս-թուրքական հարաբերություններում առկա լարվածությունը, որն արտահայտվել է երկու երկրների արտաքին գործերի նախարարների մակարդակով։ Այս մասին տեղեկացնում է թուրքական Sabah լրատվականը։
Ավստրիայի մայրաքաղաքում կայացած մամուլի ասուլիսի ընթացքում Ռուսաստանի Դաշնության արտաքին գերատեսչության ղեկավար Սերգեյ Լավրովը մեղադրել է Թուրքիային՝ «Իսլամական պետություն» ահաբեկչական խմբավորմանը աջակցություն ցուցաբերելու համար՝ ասելով, որ բազմաթիվ փաստեր կան, որոնք վկայում են Թուրքիայի և ԴԱԵՇ-ի միջև համագործակցության առկայությունը։
Այս հայտարարությունը դուր չի եկել Վիեննայի գագաթնաժողովին մասնակցող Թուրքիայի արտաքին գործերի նախարար Մևլութ Չավուշօղլուին։ Գագաթնաժողովի նիստի ընթացքում Չավուշօղլուն որոշել է պատասխանել Լավրովի այդ հայտարարություններին, և դիմելով ՌԴ ԱԳ նախարարին՝ ասել է. «Դուք, պարոն Լավրով, լուրջ դիվանագետ եք և այս գագաթնաժողովի մասնակիցներից ամենափորձառուներից մեկը, այդ պատճառով, կարծում եմ, Դուք չպետք է լուրջ ընդունեիք այդ կարգի հորինվածքները։ Եթե Ռուսաստանն ունի թեկուզ մեկ ապացույց, որը փաստում է Թուրքիայի աջակցությունը «Իսլամական պետությանը», ես պատրաստ եմ հրաժարական ներկայացնել, իսկ եթե ոչ, Ձեր կյանքի մնացած ամբողջ հատվածի համար Ձեզ հրավիրում եմ Անթալիա»։
Ուշագրավ է, որ ՌԴ ԱԳ նախարարը հարկ չի համարել որևէ կերպ պատասխանել Չավուշօղլուի խոսքերին, ինչից հետո գագաթնաժողովը շարունակվել է բնականոն հունով։
