ԱԺ պատգամավոր Հրանտ Բագրատյանը մայիսի 17-ին Ազգային ժողովում ասաց, որ արդեն երկու տարի է, ինչ ինքնաթիռներում հայերեն հաղորդումների հարցը ցանկանում է բարձրացնել:
Ըստ նրա, բացի «Ավստրիական ավիաուղիների», «Air France»-ի եւ «Ատլաս» ավիաընկերությունների, որեւէ այլ ավիաընկերությունների ինքնաթիռներում հայերեն լեզվով հաղորդում չի կատարվում:
«Սա երկրորդական հարց չեմ համարում: Ուզում եմ կոնկրետացնել՝ խոսքս վերաբերվում է ե՛ւ «Աէրոֆլոտ», ռուսական մյուս ավիաընկերություններին, ե՛ւ ուկրաինական ավիաընկերություններին: Սա Հայաստանն է, այդպիսի բան գրեթե բացառված է մեկ ուրիշ տեղ: Մենք սրա համար ունենք ավիացիայի վարչություն, մենք ծանոթ ենք ավիացիայի օրենսդրությանը եւ օդային կոդեքսին, եւ խստորեն դրանք արհամարհվում են, ոտնահարվում են նշված ավիաընկերությունների կողմից: Ես կարծում եմ, որ կառավարությունը եւ կառավարությանն առընթեր ավիացիայի վարչությունը շուտափույթ եւ կարճ ժամկետում այս խնդիրը պետք է լուծեն, որպեսզի մենք մեր արտասահմանցի գործընկերների հետ ինքնաթիռում նստած չամաչենք»,-ասաց Բագրատյանը:
Ամի ՉԻՉԱԿՅԱՆ
