«Ակնհայտ է՝ մի քանի կարեւոր հարցերի վերաբերյալ համաձայնություններ են ձեռք բերվել: Կարծում եմ, որպես առաջին հանդիպում այս լարվածությունից հետո, դա կարելի է դրական համարել»,- այսօր լրագրողների հետ զրույցում մեկնաբանելով Վիեննայում տեղի ունեցած Սերժ Սարգսյան-Ալիեւ հանդիպումը, ասաց ՀՅԴ խմբակցության ղեկավար Արմեն Ռուստամյանը:
Ռուստամյանի խոսքերով՝ հանդիպման ընթացքում հստակ վերահաստատվեց, որ խոսք չի կարող գնալ նոր հրադադարի պայմանագրի մասին եւ որ 1994-95 –ի զինադադարի պայմանագիրն ուժի մեջ է. «Սա չափազանց կարեւոր է, քանի որ արդեն իսկ ձեւաչափն է հստակեցվում»:
Մյուս գլխավոր ձեռբերումն այդ հանդիպման, ըստ Ռուստամյանի, այն էր, որ զինադադարի ռեժիմի խախտումն արձանագրող մեխանիզմների ներդրումը վերջապես կյանքի կկոչվի եւ ԵԱՀԿ գործող նախագահի անձնական հանձնակատարի թիմը կընդլայնվի:
«Որպես ստարտ՝ այսքանը կարելի է դրական համարել: Բնական է, դրանից հետո մնում են հիմնական հարցերը՝ բովանդակային հարցերը: Բայց այս հանդիպման նպատակը բովանդակային հարցերին անդրադառնալը չէր, այլ այն նախնական հայտարարությունները, որոնք Հայաստանը կատարել էր, կարելի է ասել, դրա հետ կապված առաջընթաց կա»:
Կարդացեք նաև
Ըստ պարոն Ռուստամյանի, քանի դեռ բանակցություններին չի մասնակցել Արցախը, դրանք չեն կարող կայանալ:
Հռիփսիմե ՋԵԲԵՋՅԱՆ
