Օրեցօր ավելի ու ավելի են հաճախակիանում Գերմանիայի խորհրդարանում Հայոց ցեղասպանության նախագծի քննարկման վերաբերյալ խոսակցությունները։ Հայ ժողովրդի եղեռնը, Գերմանիայի խորհրդարանի կողմից որպես ցեղասպանություն ճանաչելու նախագծի վերաբերյալ արտահայտվել է նաև այդ երկրի արտաքին գերատեսչության ղեկավար Ֆրանկ Վալտեր Շտայնմայերը։ Այդ մասին հաղորդում է թուրքական «Հաբերլեր» լրատվական գործակալությունը։
Գերմանիայի արտաքին գործերի նախարարը, արտահայտվելով 2016թ. հունիսի 2-ին այդ երկրի խորհրդարանում նախատեսված Հայոց ցեղասպանության ճանաչման նախագծի քննարկումներին, ասել է, որ ինքը անհանգստացած է Գերմանիայի խորհրդարան ներկայացված նախագծից։
Արտահայտվելով Հայոց ցեղասպանության ճանաչման նախագծի մասին՝ Շտայնմայերը, մասնավորապես, ասել է. «Հուսով եմ՝ այս նախագծի պատճառով թուրք-գերմանական հարաբերությունները չեն վնասվի և մենք միասին լավ կաշխատենք»։ Գերմանիայի ԱԳ նախարարը այդ երկրի կողմից Հայոց ցեղասպանության ճանաչման վերաբերյալ իր մտահոգությունները հայտնում էր նաև 2015թ.՝ Հայոց ցեղասպանության 100-ամյակի նախօրեին։
