ՀՀ Սահմանադրության փոփոխությունների 06.12.2015թ. հանրաքվեի թիվ 4/05 տեղամասային հանձնաժողովի նախագահ Սերգեյ Ավագյանն այսօր Արաբկիր եւ Քանաքեռ Զեյթուն վարչական շրջանների ընդհանուր իրավասության դատարանում միջնորդեց իր դեմ հարուցված քրեական գործով արագացված դատաքննություն իրականացնել: Չնայած տուժող կողմի ներկայացուցիչ՝ փաստաբան Դավիթ Գյուրջյանը առարկեց մեղադրյալի միջնորդությունը՝ հիմնավորելով, որ այդ կերպ, գործի մանրամասն քննություն չի իրականացվի ու այդպես էլ չեն բացահայտվի «պատվիրատուները», բայց դատարանը որոշեց բավարարել մեղադրյալի միջնորդությունը:
Հիշեցնենք, որ Սերգեյ Ավագյանին մեղադրանք էր առաջադրվել այն բանի համար, որ Սահմանադրության փոփոխությունների 06.12.2015թ. հանրաքվեի թիվ 4/05 տեղամասային հանձնաժողովի նախագահը, քվեարկության ընթացքում նկատել է, որ «Թրանսփարենսի ինթերնեշնլ հակակոռուպցիոն կենտրոն» հասարակական կազմակերպության անունից ՀՀ ընտրական օրենսգրքի 6-րդ հոդվածով նախատեսված կարգով դիտորդական առաքելությունն իրականացնող Գոհար Աբրահամյանի բջջային հեռախոսով տեսաձայնագրում է քաղաքացու հայտարարությունը, մոտեցել է և վերջինիս ձեռքից խլել բջջային հեռախոսն ու նրան զրկել ընտրախախտումն արձանագրելու հնարավորությունից:
Իր վերջին խոսքում, մեղադրյալն ասաց՝ խորապես զղջում է հանուն իր գաղափարների կատարած ապօրինության համար:
Մեղադրյալի պաշտպանն էլ դատարանին խնդրեց ամենամեղմ պատիժն ընտրել՝ հաշվի առնելով դատարան ներկայացված իր պաշտպանյալի մասին դրական բնութագրերը, այն, որ նա երբեւէ դատված չի եղել, ունի բարձրագույն կրթություն, հեռանկարային երիտասարդ է, ու նրա համար մեծ հարված է ցանկացած սխալ, անօրինական արարք գործելը, մանավանդ, որ դա կապված է այլ անձանց իրավունքների սահմանափակման հետ. «Ծանր է նաեւ դատվածություն ունենալու հանգամանքը՝զուգակցելով պետք է նկատի ունենալ, որ ամբաստանյալը գիտակցել է, որ պետական կարեւորության աշխատանք է անում ու իր համոզմունքներից ելնելով՝ երիտասարդին հատուկ քայլ է կատարել»:
Կարդացեք նաև
Տուժողի ներկայացուցիչ Դավիթ Գյուրջյանն էլ ռեպլիկի կարգով հակադարձեց մեղադրյալի պաշտպանին. «Որ ասում է՝ պետական կարեւորության գործ է կատարել, կասկածի տակ չենք էլ դնում, որովհետեւ պետական կարեւորության գործ են արել ու ինչ-որ մեկի պատվերն են կատարել՝ համապատասխան խախտումները կատարելով, դրա համար էլ առարկում էինք, որ արագացված դատաքննություն չանցկացվի, եւ դատաքննության ընթացքում այդ բոլոր հարցերի պատասխանը տրվի»:
Եվ ինչպես արդեն տեղեկացրել էինք, դատարանը Սերգեյ Ավագյանին ճանաչեց մեղավոր՝ նշանակելով մեկ միլիոն դրամ տուգանք:
Մանրամասներն` ավելի ուշ
Արփինե ՍԻՄՈՆՅԱՆ
