Տնտեսագետ Վահագն Խաչատրյանը, որը նաեւ Հայ ազգային կոնգրեսի անդամ է, այսօր անդրադարձավ ՀՀ-ում Եվրամիության պատվիրակության ղեկավար Պյոտր Սվիտալսկիի այն հայտարարությանը որով ԵՄ դեսպանը ՀՀ իշխանություններին կոչ էր արել կոռուպցիայի դեմ տեսանելի պայքար մղել` հակառակ դեպքում Հայաստանի համար նախատեսված 15 միլիոն եվրոն չեն հատկացնի:
Պարոն Խաչատրյանը, սակայն, ոչ այնքան գումարի մասով էր անհանգստացած, որքան օտարերկրացի որեւէ մի պաշտոնյա մեր երկրում նման հայտարարություն է անում. «Որպես Հայաստանի Հանրապետության քաղաքացի, ես չէի ուզի, որ որեւէ մի պաշտոնյա իմ երկրում այդպիսի հայտարարություն աներ: Բայց ես տեսնում եմ, որ դա այդ մարդով չի պայմանավորված, այլ պայմանավորված է Հայաստանի այսօրվա կառավարման համակարգով, որը հենց ինքն իրեն թույլ է տալիս, որ իր հետ այդպես վարվեն: Ես տեղյակ եմ, որ իրականում, տարիներ շարունակ, լրջագույն ֆինանսական միջոցներ են հատկացվել Հայաստանին կոռուպցիայի վերացման նպատակով: Բայց մեզ մոտ ոչ թե կոռուպցիան վերացել է, այլ, եթե այն կրում էր մասնակի կամ տեղային բնույթ, հիմի դարձել է համակարգային»:
Վահագն Խաչատրյանը նաեւ խոսեց քննարկման դրված հարկային նոր օրենսգրքից , որը մի շարք քաղաքական-հասարակական գործիչների մտահոգությունն է առաջացրել, մասնավորապես` օրենսգրքի փոքր ու միջին բիզնեսի վերաբերող հատվածներով:
Կարդացեք նաև
Ըստ տնտեսագետի, հարկային օրենսգրքում կրկին իջեցվում է փոքր եւ միջին բիզնեսի հարկման շեմը, որը մի քանի տարի առաջ ՓՄՁ պահանջով 56 միլիոնից դարձել էր 120 միլիոն:
«Հիմի դարձել է 40 միլիոն, ինչը փոքր եւ միջին բիզնեսի, ընդհանրապես գոյության հարցը հարցականի տակը դնելն է»:
Պարոն Խաչատրյանի մեկնաբանությունները` տեսանյութում
Ըստ նրա, նոր օրենսգրքով պետք է հարկվի գյուղատնտեսությունը, առողջապահությունն ու կրթությունը:
Վահագն Խաչատրյանը ոչ մի կերպ չի համոզվում, որ ՀՆԱ-ի մեջ գյուղատնտեսության հատվածը 11 տոկոս է, ինչպես որ պնդում է կառավարությունը: Նրա խոսքերով, տեղական ինքնակառավարման մարմիններն այդ թվերը «նկարել են», որպեսզի հայտարարած 3 տոկոս ՀՆԱ-ի տակից կարողանան դուրս գալ: Մինչդեռ պարոն Խաչատրյանը համոզված է, հատկապես վերջին մի քանի տարում երկրի տնտեսությունում ստեղծված վիճակով պայմանավորված, 3 տոկոս ՀՆԱ-ն անհնարին է:
Վահագն Խաչատրյանի խոսքերով, վերջին տարիներին մեր երկիրը չօգտագործեց ներքին արտադրությունը զարգացնելու հնարավորությունը եւ ներքին արտադրություն չունենալով փորձում ենք արտահանում ապահովել: Եվ որ ամենավտանգավորն է, ըստ տնտեսագետի, հանքահումքային արտադրանքի տեսակարար կշռի մեծացումը արտահանման մեջ` Թեղուտի եւ Զանգեզուրի պղնձամոլիբդենային համալիրի հաշվին, ինչն, ըստ պարոն Խաչատրյանի, մեծ վնասներ կհասցնի Հայաստանի բնապահպանությանը: Ըստ նրա, այդ ոլորտում 7-8 հազար մարդ է աշխատում, մինչդեռ բնապահպանական խնդիրներն ավելի գերակա են:
ՀԱԿ անդամը կարծում է, որ փոփոխությունների միակ մեթոդը քաղաքական լուծումներն են. «Մենք հիմա հայտնվել ենք խորագույն ճգնաժամի մեջ: Ե’ւ մենք ե’ւ Ռուսաստանը համակարգային ճգնաժամի մեջ ենք, մենք կարիք ունենք համակարգային բարեփոխումներ անելու»:
Պարոն Խաչատրյանը գտնում է, որ կառավարման արդյունավետության համար առնվազն մի քանի նախարարություն պետք է կրճատել:
Լուսինե ԲՈՒԴԱՂՅԱՆ
