«Իմ տոհմը Ղարաբաղում է: Էդ գյուղից մենակ ես եմ դուրս եկել, իմ ամբողջ հարազատները հենց հիմա դիրքերում են: Ես չեմ ստորագրի սրա տակ: Բա եթե հանկարծ, Աստված չանի, մենք ընդունեցինք եւ սա առիթ դառնա լայնամասշտաբ գործողությունների համար, ո՞վ է պատասխան տալու, էս հանձնաժողովը՞»,- այսօր ԱԺ արտաքին հարաբերությունների հանձնաժողովում Զարուհի Փոստանջյանի եւ Հրանտ Բագրատյանի հեղինակած Արցախի հանրապետությունը ճանաչելու մասին նախագծի քննարկման ժամանակ ասաց ՀՀԿ խմբակցության պատգամավոր Համլետ Հարությունյանը:
Ըստ նրա, այդ հարցը պետք է համաժողովրդական հանրաքվեի միջոցով լինի. «Բա որ ես ստորագրեմ սրա տակ ու Ադրբեջանը 5 օր հետո ռազմական գործողությունները ասի՝ սկսում ենք, ո՞վ է պատասխան տալու, մեր 131 հոգին պատասխա՞ն է տալու հետեւանքների համար: Ամենաշատը ես եմ ուզում, որ Ղարաբաղը ճանաչվի, բայց էդ հետեւանքները, պատասխանատվությունը վերցնո՞ւմ ենք մեր վրա, պարոն Բագրատյան»:
ՀՀԿ պատգամավոր Սամվել Ֆարմանյանի խոսքերով՝ «Որեւէ մեկի համար գաղտնիք չէ, որ պատմականորեն միշտ քննարկվել է այս հարցը: Երկու տեսակետների կողմնակիցներ էլ միշտ եղել են: Վերջին իրադարձությունները եկան ապացուցելու, որ Ադրբեջանը, ի հեճուկս միջազգային հանրության դիրքորոշման, պատրաստվում է ռազմական գործողությունների»: Ըստ Սամվել Ֆարմանյանի, Փոստանջյանի հիմնավորումները կաղում են, որովհետեւ ոչ ոք չի կարող ասել, թե ինչ ռազմաքաղաքական հետեւանքներ կունենա դա այս իրավիճակում»:
Կարդացեք նաև
Հետո նա դիմեց Հրանտ Բագրատյանին. «Երբ որ տիկին Փոստանջյանի խոսքից հետո պարոն Արզումանյանն ասում է, որ գոնե կենդանի ղարաբաղցի տեսե՞լ եք եւ դա ձեզ նյարդայնացնում է, ես ակնկալում եմ, որ դուք նույն կերպ էմոցիոնալ կարձագանքեք տիկին Փոստանջյանի այն ձեւակերպումներին, որտեղ վատաբանում է ՀՀ նախագահին: Դուք էլ վստահ եք, որ ՀՀ նախագահն էլ գոնե ձեր չափ Ղարաբաղի համար ինչ-որ բան արել է: Բագրատյանն արձագանքեց՝ «էս ի՞նչ ա ասում, է»:
Արտաշես Գեղամյանն էլ ասաց՝ «Ես ժամանակին ձեզանից դաժան եմ քննադատել ՀՀ նախագահին, բայց պատերազմական իրավիճակում պետք է սատարել գլխավոր գերագույն հրամանատարին»:
Հռիփսիմե ՋԵԲԵՋՅԱՆ
