Եվրատեսիլ-2016 երգի միջազգային մրցույթում Ուկրաինայի ներկայացուցիչ Ջամալայի կատարած «1944» անվամբ երգը հաղթող ճանաչվելուց հետո այս իրադարձությունը բուռն քննարկման նյութ է դարձել Ռուսաստանի ու Թուրքիայի հասարակական-քաղաքական շրջանակներում։ Այս մասին տեղեկացնում է ռուսական «ՌԻԱ» լրատվական գործակալությունը։
Ջամալայի հաղթանակից հետո Եվրատեսիլ-2017 երգի մրցույթը պետք է տեղի ունենա Ուկրաինայում, և արդեն հիմիկվանից բուռն քննարկումների առարկա է դարձել, թե կոնկրետ որ քաղաքում պետք է տեղի ունենա Եվրատեսիլի հաջորդ տարվա մրցույթը։
Այս կապակցությամբ կարծիք էր հայտնել նաև Յուլիա Տիմոշենկոն՝ ասելով, որ ճիշտ կլինի հաջորդ տարի կայանալիք երգի միջազգային այդ մրցույթն անցկացնել ուկրաինական Ղրիմում։
Ջամալայի հաղթանակի և հաջորդ տարվա Եվրատեսիլի անցկացման կոնկրետ վայրի վերաբերյալ վերը նշված աղբյուրը մեկնաբանություն է խնդրել նաև պաշտոնական Մոսկվայից։ Ռուսական «ՌԻԱ» լրատվական գործակալության խնդրանքին արձագանքել է Ռուսաստանի Դաշնության նախագահի մամուլի խոսնակ Դմիտրի Պեսկովը՝ ասելով. «Դա մեր խնդիրը չէ»։
