Այսօր ԱԺ արտաքին հարաբերությունների հանձնաժողովում շատ թեժ եւ բուռն մթնոլորտում քննարկվեց Զարուհի Փոստանջյանի եւ Հրանտ Բագրատյանի հեղինակած՝ Արցախի հանրապետությունը ճանաչելու մասին նախագիծը:
Բնականաբար, ՀՀԿ-ականները ընդդիմացան՝ ժամանակը չէ, չենք կարող ընդունել, քանի դեռ մեր գործընկերները, միջազգային հանրությունը չի սատարել դրան:
Զարուհի Փոստանջյանն արձագանքեց. «Դուք ոչ մի գործընկեր էլ չունեք, դուք սուվերենություն եք կորցրել, վաճառել եք Հայաստանի սուվերենությունը»:
Կարդացեք նաև
Հանձնաժողովի նախագահ Արտակ Զաքարյանն էլ պատասխանեց. «Ոչ մի փաստաթղթում հողերի վերադարձման հարց չի եղել: Եթե դուք ունեք հողերի վերադարձման փաստաթուղթ, գնացեք ձեր «Ժառանգությունում» քննարկեք էդ փաստաթուղթը: Այսօրվա մեր խնդիրն է հասնել կայուն զինադադարի, ունենալ կայուն երաշխիքներ, նոր մտածել՝ որտեղից սկսել»:
Հրանտ Բագրատյաննն ասաց. «Բացատրեք մեզ, համոզեք, որ կլինի ավելի հարմար պահ, քան հիմա է՝ այս փաստաթուղթն ընդունելու համար: Ասում եք՝ հող չենք հանձնում, ո՞վ ասաց, մոռացե՞լ եք, որ 3 շաբաթ առաջ Սերժ Սարգսյանը , երբ ղեկավարությունը խեղճացել էր, երբ մի քիչ տեղյակ չէր, թե ինչ է տեղի ունեցել մարտի դաշտում, խեղճացել էր եւ բաց թողեց իր շուրթերից այն, որ Կազանում 2011-ին համաձայնվել ենք տալ տարածքներ, նաեւ Ղարաբաղի տարածքում այլ ռազմական ուժեր տեղադրելուն եք համաձայնվել: Սրա՞ն ինչպես կարձագանք, ասում եք՝ զիջելու հարց չի եղել: Այդ բանն ասվել է ՀՀ նախագահի կողմից: Այս ամենից հետո կարո՞ղ եք որեւէ արգումենտ բերել, որ երբեւիցե կլինի ավելի լավ ժամանակ Ղարաբաղը ճանաչելու: Իմ խորին համոզմամբ, ոչ մի Մինսկի խումբ, ոչ մի Ադրբեջան, ոչ մի միջազգային հանրություն Ղարաբաղի անկախությունը երբեւիցե չի ճանաչելու»:
Արտակ Զաքարյանն ասաց, որ Կազանի փաստաթղթի ամբողջ իմաստը ԼՂՀ ժողովրդի ինքնորոշման իրավունքի իրացման ճանապարհն է: ՀՀ նախագահն ասել է մի կերպ, դուք հասկացել եք այլ կերպ»:
Հռիփսիմե ՋԵԲԵՋՅԱՆ
