ՀԱՕԿ-ի գլխավոր քարտուղար, ՀՀ բասկետբոլի ֆեդերացիայի նախագահ Հրաչյա Ռոստոմյանը «Առավոտի» հետ հարցազրույցներից մեկում ասել էր, որ մարզաձեւը վերջին տարիներին հանրապետությունում զգալի առաջընթաց է ապրել եւ արդեն ժամանակն է նաեւ միջազգային ասպարեզներում ավելի բարձր արդյունքներ արձանագրելու:
Բասկետբոլի տղամարդկանց ազգային հավաքականի համար նպատակն իրականություն դարձնելու առաջին առիթը, թերեւս, լինելու է հունիսի 28-ից հուլիսի 3-ը Քիշնեւում (Մոլդովա) կայանալիք Եվրոպայի փոքր երկրների առաջնությունը, որին մասնակցելու է ութ երկիր:
Մեր հավաքականը Եվրոպայի առաջնությանը նախապատրաստվել սկսելու է հունիսի 1-ից: Գլխավոր մարզիչ Տիգրան Գյոկչյանը, որը երկար տարիների աշխատանքի փորձ ունի Լիբանանում եւ մարզել է ինչպես մեծահասակների ու երիտասարդների հավաքականները, այնպես էլ մի շարք առաջատար ակումբներ, արդեն հրապարակել է հավաքի հրավիրված 16 բասկետբոլիստների անունները, որոնցից վերջնականապես ընտրելու է 12-ին: Մարզիչը նախատեսել է այդ ընթացքում նաեւ ստուգողական հանդիպումներ անցկացնել, ինչի համար հրավերներ են ուղարկվել մի շարք երկրներ: Սակայն այսօրվա դրությամբ դեռեւս հայտնի չէ, թե ովքեր կարձագանքեն:
Մարզիչը հավաքական հրավիրել է աշխարհի տարբեր երկրներում ապրող լավագույն հայ բասկետբոլիստներին, իսկ ինքը օգնականների հետ ուսումնասիրում է ապագա մրցակիցների խաղերը: Նա համոզված է, որ Հայաստանի հավաքականն ի վիճակի է պայքարել ամենաբարձր տեղերի համար եւ իրականացնել իր առջեւ դրված խնդիրները:
Կարդացեք նաև
ԱՇՈՏ ՀԱԿՈԲՅԱՆ
«Առավոտ» օրաթերթ
14.05.2016
