Հանձնաժողովի անդամները լսել են ՀՀ հանրային հեռուստառադիոընկերության խորհրդի նախագահ Ռուբեն Ջաղինյանի ամենամյա հաղորդումը՝ ՀՀ հանրային հեռուստառադիոընկերության 2015 թվականի գործունեության վերաբերյալ:
Այսօր տեղի է ունեցել ՀՀ ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի արտագնա նիստը՝ Արտակ Դավթյանի նախագահությամբ: Արտագնա նիստն անցկացվել է Հայաստանի հանրային հեռուստաընկերության շենքում: Մինչ ամենամյա հաղորդումը լսելը ՀՀ ԱԺ պատգամավորները շրջել են տարածքում, ծանոթացել կատարվող բարեփոխումներին, իրականացվող շինարարական աշխատանքներին:
Ազգային ժողովի պաշտոնական կայքի համաձայն՝ հանձնաժողովի անդամները լսել են ՀՀ հանրային հեռուստառադիոընկերության խորհրդի նախագահ Ռուբեն Ջաղինյանի ամենամյա հաղորդումը՝ ՀՀ հանրային հեռուստառադիոընկերության 2015 թվականի գործունեության վերաբերյալ: Հաղորդումը ներկայացրել է Հայաստանի հանրային հեռուստաընկերության տնօրեն Մարգարիտա Գրիգորյանը:
Կարդացեք նաև
Տիկին Գրիգորյանը պատգամավորներին ներկայացրել է Հանրային հեռուստաընկերության 2015 թվականի գործունեության նպատակներն ու խնդիրները, հաշվետու տարում իրականացված ծրագրերը, տեխնիկական վերազինմանը եւ հեռուստահաղորդումների հեռարձակմանն առնչվող հարցերը: Նա անդրադարձել է նաեւ Հանրային հեռուստատեսության եւ Հայաստանի հանրային ռադիոընկերության ֆինանսատնտեսական գործունեությանը եւ ծախսերին, խոսել է շենքերի եւ շինությունների հիմնանորոգման աշխատանքների մասին:
Հաղորդման ավարտից հետո Ռուբեն Ջաղինյանը եւ Մարգարիտա Գրիգորյանը մանրամասն պատասխանել են ԱԺ պատգամավորներին մտահոգող հարցերին: Հանձնաժողովն ի գիտություն է ընդունել ՀՀ հանրային հեռուստառադիոընկերության խորհրդի հաղորդումը:
«Հեռուստատեսության եւ ռադիոյի մասին» ՀՀ օրենքի 43-րդ հոդվածի համաձայն՝ հաջորդ հաղորդումը ներկայացրել է Հեռուստատեսության եւ ռադիոյի ազգային հանձնաժողովի նախագահ Գագիկ Բունիաթյանը: Նա նշել է, որ 2015 թվականին ՀՀ-ում գործել են 95 հեռուստաընկերություն եւ 18 ռադիոընկերություն: 2015 թվականի ընթացքում հանձնաժողովը ՀՀ քաղաքացիներից ստացել է 754 գրություն եւ 6 դիմում-բողոք՝ կազմակերպություններից: Տուգանք է կիրառվել կաբելային հեռարձակում իրականացնող չորս ընկերությունների նկատմամբ: Հաշվետու տարում կատարված աշխատանքը, ընթացիկ խնդիրներն ու ծրագրերը ներկայացնելուց հետո Գագիկ Բունիաթյանը պատասխանել է ԱԺ պատգամավորների հարցերին: Հաղորդումն ընդունվել է ի գիտություն:
