Ապրիլյան քառօրյա պարտադրված պատերազմն, ըստ Իրավաբանների հայկական ասոցիացիայի նախագահ, ՔՀԿ-ների կոալիցիայի քարտուղարության համակարգող Կարեն Զադոյանի, երկու արդյունք արձանագրեց. Առաջին`զինվորների, կամավորների սխրագործությունները, երկրորդ`մեր հասարակությանը տեսանելի դարձան կոռուպցիայի վնասակար հետեւանքները մեր երկրում:
«Կառավարություն – Քաղաքացիական հասարակություն» հակակոռուպցիոն համաժողովի ժամանակ խոսելով Հայաստանում կոռուպցիայի դեմ պայքարից, Կարեն Զադոյանն ասաց`գեներալների, պաշտոնյաների ահռելի չափերի հասնող ունեցվածքի վերաբերյալ հրապարակումները մեր հասարակությանը ցույց տվեցին, թե որն է կոռուպցիան:
Նա կոռուպցիայի դեմ պայքարը արդյունավետ է համարում այն ժամանակ, երբ քաղաքացիական հասարակությունը ձեռք է մեկնում կառավարությանը՝ իրական արդյունքներ նվաճելու համար: Այս համատեքստում, նա դրական է գնահատում ստեղծված հակակոռուպցիոն հարթակի շրջանակներում համատեղ խմբի գոյությունն ու գործունեությունը:
«Մեր երկրում համար մեկ խնդիրը անպատժելիության վերացումն է: Երկրորդ խնդիրը ապօրինի հարստացած անձանց, ոչ թե պետք է կուլակաթափ անել, այլ օրինական միջոցով, դատարանների միջոցով պետությանը վերադարձնել ապօրինի հարստությունները եւ նրանց ենթարկել քրեական պատասխանատվության»,- ասաց Զադոյանը:
Կարդացեք նաև
Կոռուպցիայի դեմ պայքարում կարեւոր գործոններից մեկն էլ Կարեն Զադոյանը համարում է հանրության շրջանում արդարադատության համակարգի նկատմամբ վստահության ամրապնդումը:
Նելլի ԳՐԻԳՈՐՅԱՆ
