Քաղաքագետ Աղասի Ենոքյանի համոզմամբ, ապրիլյան դեպքերի ընթացքում ադրբեջանցիների իրականացրած վայրագությունները հայկական կողմի ձեռքին լուրջ կռվան են դարձել:
«Այս ամեն ինչը ցույց է տալիս, որ անիմաստ է խոսել ԼՂ-ն կամ որոշ տարածքներ Ադրբեջանին վերադարձնելու մասին: Նոր փաստաթուղթ ունենալու պահանջ է առաջանում, մեր ունեցած հին փաստաթուղթն, ըստ էության, 1994-95 թվականի հրադադարի պայմանագիրն է, դրանից հետո փաստաթուղթ չենք ունեցել եւ հիմա դրան նոր շունչ պետք է հաղորդենք նաեւ տրամաբանության առումով, որովհետեւ դրանից հետո ԼՂ-ն դուրս է մնացել բանակցություններից, իսկ իրականում ԼՂ-ն համաստորագրող էր այդ փաստաթղթին, եւ կարծում եմ՝ ԼՂ-ին բանակցային սեղանի շուրջ վերադարձնելու անհրաժեշտություն կա, որովհետեւ ակնհայտ է, որ առանց Ղարաբաղի մասնակցության ոչինչ չի ստացվում: Այս հանդիպումը լուրջ հնարավորություն է օգտագործել այդ գործոնը»,- այսօր «Հենարան» ակումբում ասաց քաղաքագետը:
Խաղաղության երաշխիքներն էլ, ըստ նրա, բանակցությունների ժամանակ պետք է սահմանվեն. «Սերժ Սարգսյանը դրեց նախապայմաններ, դրանց մի մասը կատարվել է, մի մասը չի կատարվել, պետք է նայենք՝ մեզ որն է ավելի ձեռնտու՝ ասենք կատարվել է, թե ասենք չի կատարվել: Ամեն դեպքում, խաղաղության հիմնական երաշխիքը ԼՂ ճանաչումն է»:
ԱԺ պատգամավոր Թեւան Պողոսյանն էլ կարծում է՝ առաջիկա հանդիպմանը որեւէ մեկը չի քննարկելու ԼՂ հիմնահարցը, քննարկելու են՝ ինչպես անել, որ պահպանվի ստատուս քվոն, ու էլ չկրակեն:
Կարդացեք նաև
Ըստ նրա, այս հանդիպումը կարեւոր է նրանով, որ բոլորը միասին կնստեն ու կհասկանան՝ ինչ անել, հայկական կողմը, նրա կարծիքով, նաեւ պետք է ներկայացնի, որ հակամարտության լուծման առումով առանց ԼՂ-ի մասնակցության քննարկումներն անիմաստ են:
Պատգամավորը կրկնեց իր ավելի վաղ հայտնած կարծիքը, որ հակամարտության լուծմանը առաջիկա երեք չորս սերունդները չեն հասնի:
Աղասի Ենոքյանն էլ նկատեց, որ տպավորություն ունի, որ հանդիպումը բավականին դժվար է կազմակերպվել, իսկ եթե, ի սկզբանե, լիներ Ադրբեջանի նկատմամբ մեղադրանքներ, այս հանդիպումն էլ ավելի դժվար կլիներ կազմակերպել:
Արփինե ՍԻՄՈՆՅԱՆ
