Ռուսական Независимая Газета պարբերականը ծավալուն վերլուծական է հրապարակել, որտեղ անդրադարձել է Լեռնային Ղարաբաղի հակամարտությանը։
Հոդվածի սկզբում պարբերականը նշում է, որ Հայաստանի և Ադրբեջանի նախագահները կարող են հանդիպել 2016թ. մայիսի 16-ին՝ Վիեննայում։ Այս նախաձեռնությամբ հանդես էր եկել ԵԱՀԿ Մինսկի խումբը, և նման հանդիպման կայացման դեպքում` դրան ներկա են լինելու նաև համանախագահող երկրների արտաքին գերատեսչությունների ղեկավարները։
Մասնագետները խիստ կարևորում են բանակցությունների վերսկսումը, և Վիեննայի հանդիպումը դրական լուրջ քայլ կարող է համարվել։ Ռուսական պարերականը ներկայացնում է նաև 2016թ. ապրիլի սկզբին տեղի ունեցած դեպքերը՝ ավելացնելով, որ թեև այժմ վերահաստատվել է հարաբերական հրադադարը, սակայն կողմերը մեղադրում են միմյանց այն խախտելու մեջ և շփման գոտում իրավիճակը շարունակում է լարված մնալ։
Հոդվածում մեջբերվում է նաև ՌԴ նախագահի մամուլի խոսնակ Դմիտրի Պեսկովի խոսքերը, որn անդրադարձել էր ՀՀ և Ադրբեջանի նախագահների միջև հնարավոր հանդիպմանը. «Մոսկվայում կողջունվի ցանկացած գործողություն, որը միտված է կարգավորել Ղարաբաղյան հակամարտությունը»։
Կարդացեք նաև
Ռուսական պարբերականի հոդվածի վերջին մասում նշվում է, որ բարդ է կողմերից կոնկրետ առաջընթաց ակնկալել, որովհետև Հայաստանի և Ադրբեջանի դիրքորոշումները հակամարտության ամենակարևոր հարցի՝ Լեռնային Ղարաբաղի կարգավիճակի վերաբերյալ ամբողջովին հակասում են միմյանց և որևէ մեկը պատրաստ չէ զիջումների գնալ այս հարցում։
