Ռուսաստանցիների ավելի քան մեկ երրորդի` 35 տոկոսի համոզմամբ, Լեռնային Ղարաբաղի՝ որպես անկախ պետության գոյությունը կհամապատասխանի Ռուսաստանի Դաշնության ազգային շահերին: Այդ են վկայում Մոսկվայում գործող խոշորագույն սոցիոլոգիական ծառայություններից մեկի` Հանրային կարծիքի ուսումնասիրության համառուսաստանյան կենտրոնի (ВЦИОМ) անցկացրած հետազոտության արդյունքները, որոնք հրապարակվել են այսօր:
Հարցված ռուսաստանցիների 9 տոկոսի համոզմամբ, իրենց երկրի շահերից է բխում, որպեսզի Լեռնային Ղարաբաղն ընդգրկվի Հայաստանի կազմում: Ղարաբաղի` Ադրբեջանի կազմում գտնվելու կողմնակիցների թիվը ռուսաստանցիների շրջանում, ըստ ВЦИОМ-ի հարցման, չի գերազանցում վեց տոկոսը:
Մոսկվացի սոցիոլոգները նաև փորձել են պարզել ռուսաստանցիների տեսակետը՝ Լեռնային Ղարաբաղի պատկանելության հարցում: Պարզվում է, որ հարցվածների մեկ քառորդից ավելին` 26 տոկոսը, այսօր էլ համոզված է, որ Լեռնային Ղարաբաղն անկախ պետություն է: Եվս 13 տոկոսի համոզմամբ, Ղարաբաղը Հայաստանի, 11 տոկոսնի կարծիքով էլ՝ Ադրբեջանի մասն է:
Նկատենք, ի դեպ, որ ապրիլյան պատերազմից հետո Լեռնային Ղարաբաղի մասին ռուսաստանցիների տեղեկացվածության մակարդակը կտրուկ կերպով աճել է: «Եթե 2014 թվականին հարցված ռուսաստանցիների միայն 10 տոկոսն էր ասում, որ քաջածանոթ է ղարաբաղյան հակամարտության նախապատմությանը, ապա այսօր արդեն այդ ցուցանիշը հասել է 25 տոկոսի»,- նշում են ВЦИОМ-ի մասնագետները, հավելելով` «2014-ին հարցվածների միայն 35 տոկոսն էր նշում, թե որոշակի պատկերացում ունի այս հակամարտության մասին, այժմ արդեն նման կարծիք է հայտնել հետազոտությանը մասնակցած ռուսների 47 տոկոսը: Եթե երկու տարի առաջ ռուսաստանցիների 52 տոկոսը պնդում էր, թե երբեք չի լսել ղարաբաղյան հակամարտության մասին, ապա այժմ` ապրիլյան պատերազմից հետո, այդ ցուցանիշը կրճատվել է շուրջ երկու անգամ` հասնելով 27 տոկոսի»:
Կարդացեք նաև
Գեւորգ Ստամբոլցյան
Նյութի մանրամասները կարդացեք «Ազատություն» ռադիոկայանի կայքում
