Մենաշնորհների դեմ պայքարում էկոնոմիկայի նախարար Արծվիկ Մինասյանի հույսը նոր Սահմանադրությունն է: Այսօր կառավարության նիստի օրակարգին անցնելուց առաջ ՀՀ վարչապետ Հովիկ Աբրահամյանը հանդես եկավ հայտարարությամբ, ըստ որի, վարչապետը ի թիվս մի շարք խնդիրների, անդրադարձել է կոռուպցիային եւ մենաշնորհներին. «Հանձնարարում եմ էկոնոմիկայի նախարարին եւ առաջարկում եմ տնտեսական մրցակցության պաշտպանության հանձնաժողովին, Հայաստանում գործող տարբեր միջազգային կառույցների ներգրավմամբ, ամենասեղմ ժամկետում՝ առավելագույնը երեք շաբաթվա ընթացքում, վերլուծել Հայաստանում առկա մենաշնորհները, դրանց ազդեցությունը ազատ մրցակցային պայմաններ ունենալու վրա և առաջարկել արդյունավետ լուծումները, որոնք կարող են շտկել ստեղծված իրավիճակը»:
Այսօր կառավարության նիստից հետո լրագրողներն Արծվիկ Մինասյանից հետաքրքրվեցին, թե ինչ է նախատեսում նախարարն անել մենաշնորհների դեմ պայքարում: Ըստ Մինասյանի, նոր Սահմանադրությամբ տրված կարգավորումներն են հնարավորություն տալիս հակամենաշնորհային ակտիվ քաղաքականություն վարել մեր երկրում. «Սահմանադրական կարգավորումով ասվում է շատ պարզ՝ մենաշնորհը երկրում արգելվում է: Ցանկացած մենաշնորհ պետք է բացառապես օրենքով սահմանվի: Առաջին հերթին օրենսդրական վերանայումների կարիք կա, երկրորդը՝ գործիքակազմի վերանայում ու հստակեցում»:
Դիտարկմանը, որ հանրությունը լուրջ չի ընդունում, երբ պաշտոնյաները խոսում են, որ պետք է պայքարեն մենաշնորհների եւ կոռուպցիայի դեմ, Մինասյանն ասաց. «Գլխավոր հարցը շարունակում է մնալ բաց շուկաներ ապահովելը: Երբ խոսում ենք մենաշնորհի առաջացման մասին, առաջին հերթին պետք է քաջ գիտակցենք, որ եթե շուկայի մուտքը լինի բաց, ապա դա նշանակում է, որ շատ արագ կարող է մրցակցային միջավայր ձեւավորվել»:
Լրագրողների դիտարկմանը ՝ շաքարավազի շուկան փակ է, Արծվիկ Մինասյանն ասաց. «Ոչ, շաքարի ներկրման մասով առանձին ուսումնասիրություն է պետք, էկոնոմիկայի նախարարությունը պետք է նման ուսումնասիրություն ունենա իր ձեռքի տակ»:
Կարդացեք նաև
Նախարարն ասաց, որ շաքարավազի մուտքը շուկա պետք է ուսումնասիրեն, որպեսզի կարողանան գնահատական տալ. «Քանի՞ սուպերմարկետ կա Երեւանում, դուք՝ որպես լրագրող, կարո՞ղ եք ուսումնասիրել, էդ բոլորը մի գնորդի՞ց են ձեռք բերում շաքարավազ, թե՞ կարող են ներմուծել: Եթե կարող են ներմուծել, ի՞նչ խնդիրների առաջ են կանգնում»:
Մանրամասն՝ տեսանյութում
Նելլի ԲԱԲԱՅԱՆ
