Քաղաքագետ Ալեքսանդր Իսկանդարյանի համոզմամբ, ակնհայտ է, որ Հայաստանը ՌԴ-ի հետ զենքի մատակարարման արագացված բանակցություններ է իրականացնում.
«200 միլիոն դոլարի զենքի մասին են ասում, բայց դրանք շատ ավելի լուրջ թվեր են»,- այսօր «Բլից ինֆո» ակումբում ասաց քաղաքագետը:
Ըստ նրա, այս փուլում ԼՂ ճանաչում չի լինի, քանի որ ԼՂ հարցով երկկողմ բանակցությունները վերսկսելու հավանականություն կա. «Չեմ կարծում, որ այս փուլում հնարավոր է Հայաստանը ճանաչի ԼՂ-ն: Ճանաչումը, հասկանալի է, որ տեղի չի ունենա մոտ օրերին, թե ինչ միջոցներով հարցի ընդունումը կկանխվի, չեմ կարող ասել, բայց ճանաչում չի լինի չափազանց պարզ պատճառով, որ միջազգային հարթակում դեռևս հույս կա վերականգնել բանակցությունները և ինչ-որ կերպ ԵԱՀԿ Մինսկի ձևաչափում հարցը բանակցային դաշտ տեղափոխել»:
Հայաստանը պատրա՞ստ է Ադրբեջանին վերադարձնել ազատագրված որոշ տարածքներ, քաղաքագետի համոզմամբ՝ դժվար է ասել, բայց նրանց համար էլ պարզ չէ՝ ինչ անել հետո, որովհետև անընդհատ պատերազմ հրահրելով էլ ոչնչի չեն կարող հասնել, և իրենք դա լավ տեսնում են:
Կարդացեք նաև
Ալեքսանդր Իսկանդարյանը քիչ հավանական է համարում, որ Ադրբեջանը նորից կսկսի լայնամասշտաբ պատերազմ. «Ապրիլին սկսած ռազմական գործողություններից հետո լայնամասշտաբ պատերազմի Ադրբեջանը, համենայն դեպս, հիմա պատրաստ չէ, որովհետեւ եթե Ադրբեջանը պատրաստ լիներ լայնամասշտաբ պատերազմի, ապա ապրիլյան ռազմական գործողությունները չէր դադարեցնի: Եթե ուշադիր հետեւենք ապրիլի սկզբի իրադարձություններին, հասկանալի է դառնում, որ ադրբեջանցիները պատերազմել չեն ուզում. Տեղի ունեցածը տեղային հարձակում էր և Ղարաբաղը գրավելու նպատակ չեն ունեցել»:
Քաղաքագետը Ղարաբաղյան հնարավոր պատերազմի երկու սցենար է տեսնում. կամ կլինի՝ Կիպրոսի կոնֆլիկտի պես, երբ ոչ ոք չի ճանաչում, բայց սահմանին կրակոց չկա կամ Իսրայելի օրինակով, երբ կոնֆլիկտը կա և ռազմական գործողությունները ժամանակ առ ժամանակ թեժանում են : Կիպրոսի տարբերակը մեզ մոտ չկա, և մենք պետք է ապրենք իսրայելական վիճակով»:
Արփինե ՍԻՄՈՆՅԱՆ
