Ադրբեջանի արտաքին գործերի նախարար Էլմար Մամեդյարովը այցելել է Գերմանիա։ Մայրաքաղաք Բեռլինում Մամեդյարովը հանդիպել է այդ երկրի արտաքին գործերի նախարար Ֆրանկ Վալտեր Շտայնմայերի հետ։ Այս մասին հաղորդում է թուրքական Son Dakika-ն։
Երկու երկրների արտաքին գերատեսչությունների ղեկավարները հանգամանորեն քննարկել են Արցախի հակամարտության շուրջ ստեղծված իրավիճակը։ Ադրբեջանի ԱԳ նախարարը կրկին ներկայացրել է այդ երկրի պահանջները, որոնց համաձայն՝ հայկական զորքերը պետք է անհապաղ լքեն Լեռնային Ղարաբաղն ու դրան հարակից շրջանները։
Երկու երկրների ԱԳ նախարարները, հանդիպումից առաջ, հայտարարություններով են հանդես եկել ԶԼՄ-ների համար։ Մամեդյարովն իր հայտարարության մեջ նշել է, որ տարածաշրջանի ստատուս-քվոն անընդունելի է և չի կարող շարունակվել։
Գերմանիայի ԱԳ նախարար Շտայնմայերն իր խոսքում նշել է, որ իրենք լրջորեն անհանգստացած են վերջին շաբաթների ընթացքում կողմերի շփման գոտում գրանցված հրադադարի խախտումներից և նշել է, որ անհրաժեշտ է կրկին վերադառնալ հրադադարի ռեժիմին և քաղաքական ջանք գործադրել՝ հակամարտության լուծումը գտնելու համար։
Կարդացեք նաև
Շտայնմայերը հիշեցրել է նաև, որ անցած շաբաթների ընթացքում մի քանի հեռախոսազրույց է ունեցել Մամեդյարովի հետ և ավելացրել. «Տեղի ունեցած դեպքերը և ցավալի կորուստները ցույց են տալիս, որ ստատուս-քվոն չի կարող պահպանվել այս ձևով»։
