ԲՀԿ խմբակցության պատգամավոր Միքայել Մելքումյանի համոզմամբ` միջազգային կառույցները պետք է հստակ գնահատական տան ապրիլի սկզբին սահմանին կատարվածին:
Aravot.am-ի հետ զրույցում պարոն Մելքումյանը որոշ մանրամասներ ներկայացրեց ԵԽԽՎ համազեկուցողներ Ալան Միլի և Ջուզեպպե Գալատիի հետ հանդիպումից. «Ընտրական օրենսգրքի հետ կապված մենք կրկնել ենք այն, ինչ միշտ ասում ենք. լիակատար կոնսենսուս չկա, բայց կան խնդիրներ, որոնք լուծվել են. օրինակ` տեսանկարահանման հետ կապված հարցը, բայց ոչ ուղիղ եթերով, քվեարկության մասնակիցների համարների հետ կապված տրվում են աշխատանքային փաստաթղթեր, որոնց վստահված անձինք և կուսակցությունների ներկայացուցիչները կարող են ծանոթանալ, տեխնիկական աջակցության հետ կապված հարցեր»: Պատգամավորի փոխանցմամբ` ԵԽԽՎ համազեկուցողներին հիմնականում հետաքրքրում էին կայուն մեծամասնության և երկրորդ փուլի հետ կապված հարցեր:
Միքայել Մելքումյանից հետաքրքրվեցինք` ապրիլյան իրադարձություններին չեն անդրադարձե՞լ: Պատգամավորը պատասխանեց. «Անդրադարձել եմ այդ խնդիրներին, որ միջազգային կառույցները ապրիլյան քառօրյա պատերազմի ժամանակ և հետո հստակ գնահատական պիտի տային, ոչ թե հավասարության նշան դրվեր»: Հետաքրքրվեցինք` ինչպե՞ս արձագանքեցին համազեկուցողները, պարոն Մելքումյանը պատասխանեց. «Բոլոր դեպքերում դրան որևէ ռեակցիա չեղավ»:
Տաթև ՀԱՐՈՒԹՅՈՒՆՅԱՆ
