«ՀՀ կրթության և գիտության նախարարությունը փորձելու է հնարավորինս պարզեցնել հանրակրթական ուսումնական հաստատության ղեկավարման իրավունքի համար հավակնորդների հավաստագրման քննությունները»,- այսօր Երևանի Ջոն Կիրակոսյանի անվան թիվ 20 դպրոցում ՀՀ հանրակրթական ուսումնական հաստատության ղեկավարման իրավունքի (հավաստագրի) համար հավակնորդների հավատարմագրման քննության մեկնարկին ասաց ՀՀ ԿԳ նախարար Լևոն Մկրտչյանը:
Նա նշեց, որ գործընթացը պարզեցնել այս տարի չեն հասցնի, բայց հաջորդ տարիներին այն տնօրենները, որոնք մեկ անգամ անցել են հավաստագրում և ունեն հավաստագիր, պարզապես զրույցի կհրավիրվեն. «Հանձնաժողովի կազմում զրույցին կմասնակցեն մեր հանրապետությունում հարգված մասնագետները: Պարզապես զրույց կլինի, և նրանք կստանան հավաստագրերը: Քննություններն ավելի պարզ կդառնան նրանց համար, որոնք առաջին անգամ կփորձեն մասնակցել հանրակրթական ուսումնական հաստատության ղեկավարման իրավունքի համար քննություններին»:
Հանձնաժողովի անդամ Կարո Նասիբյանը փաստեց, որ քննությանը մասնակցում է 116 տնօրեն, տևում է 90 րոպե. «Թեստը բաղկացած է 60 առաջադրանքից, ի տարբերություն միասնական քննությունների՝ պատասխանների ձևաթղթում սխալն ուղղելու տեղ չկա: Տնօրենները կարող են կատարել ընդամենը 6 սխալ, այսինքն` 54 առաջադրանք պետք է ճիշտ կատարեն: Թեստերում առանձնապես փոփոխություն չի եղել, հիմնականում խմբագրական աշխատանքներ են կատարվել: Թեստը կազմվել է ԿԳՆ-ում և Գնահատման և թեստավորման կենտրոնի հետ որևէ առնչություն չի ունեցել»:
Լրագրողների հետ զրույցի ժամանակ հանձնաժողովի անդամն ասաց, որ մասնակցել է թե՛ դիմորդների ընդունելության, թե՛ տնօրենների հավաստագրման քննություններին, և տարբերությունը դիմորդների ու տնօրենների միջև սկզբից ևեթ երևում է. «Դիմորդները, երբ գալիս են, հանգիստ նստում են իրենց տեղերը, իսկ տնօրեններն ավելի աշխույժ են, քան իրենց աշակերտները: Հետաքրքիրն այն է, որ նստելուն պես տնօրենները սկսեցին աշխատել և կողքերը չնայել, իսկ աշակերտների մոտ այլ է. չգրող աշակերտը 10 րոպե հետո արդեն իր թեստին կամ պատասխան ձևաթղթին չի նայում»:
Կարդացեք նաև
Նա նաև անդրադարձավ թեստի բովանդակությանը, նկատելով, որ չկա այնպիսի հարց, որ նրանց բնագավառից չէ. «Հարցերն օրենսդրական դաշտից են, սահմանադրությունից, կրթության մասին օրենքից, գնումների մասին օրենքից, այսինքն՝ այն ամենից, ինչը կապված է տնօրենի աշխատանքային գործունեության հետ, թե որ օրենքին է առնչվում»:
Քննության պատասխանները փակցվելու են դպրոցում քննության ավարտից մոտ մեկ ժամ հետո, հաջորդ փուլը բանավոր է լինելու՝ հարցազրույց, որն անցկացնելու է ԿԳՆ-ն:
Արփի ԿԻՐԱԿՈՍՅԱՆ
