«Մենք համոզված ենք այս նախագծի ճշմարտացիության մեջ: Հնարավորություն է տրվում փրկելու գործարանը, որ ընկերությունը վերականգնի իր դիրքերը շուկայում»,- ԱԺ նիստում «Հրազդան ցեմենտ» գործարանին հարկային եւ պարտադիր սոցիալական ապահովագրության գծով առաջացած տույժերից ազատելու մասին նախագծի քննարկման ժամանակ պատգամավորներին այսպես համոզում էր կողմ քվեարկել էկոնոմիկայի նախարար Արծվիկ Մինասյանը:
Հիշեցնենք, որ այդ նախագիծն արդեն մեկ անգամ չէր ընդունվել:
ԱԺ տնտեսական հարցերի հանձնաժողովի նախագահ Վարդան Այվազյանը դեռ քվեարկությունից հետո վստահեցրել էր, որ կրկին են փորձելու ու նախագիծն անցկացնելու են:
Կառավարությունը արտահերթ նիստով նորից բերեց ԱԺ եւ այս անգամ անցկացրեց: Այսօր ԱԺ նիստում նախագիծն առաջին ընթերցմամբ ընդունվեց 86 կողմ, 8 դեմ, 9 ձեռնպահ ձայների հարաբերակցությամբ:
Կարդացեք նաև
Քվեարկության դրվեց նաեւ երեկ ԱԺ-ում քննարկված Կուտակային կենսաթոշակի պարտադիր վճարումները մեկ տարով հետաձգելու մասին կառավարության նախագիծը եւ ընդունվեց 104, 4 ձեռնպահ քվեարկության արդյունքներով:
Հռիփսիմե ՋԵԲԵՋՅԱՆ
