Պաշտպանության նախարարության բարձրաստիճան պաշտոնյաների պաշտոնանկությունից հետո հասարակությունն ակնկալում է նաեւ պատասխանատվության ենթարկելու հարց: Ապրիլի քառօրյա պատերազմից հետո հասարակական համախմբման պայմաններում պետության առողջացմանը, ամրապնդմանը հասնելու հարցում կարո՞ղ ենք ձեռքբերումներ ունենալ՝ այս հարցն ուղղեցինք «Ջեյմսթաուն» հիմնադրամի հոդվածագիր Արմեն Գրիգորյանին:
«Պատասխանատվության խնդիրն իշխանությունը չի լուծելու` յուրայիններին չհանձնելու ձգտման ու եւս մի կարեւոր հանգամանքի պատճառով. նախկին պաշտոնյաներին քրեական պատասխանատվության ենթարկելու դեպքում նրանց վերադասների վերաբերյալ ցուցմունքները կբացահայտեն խնդրի շատ ավելի խորը եւ բարդ լինելը: Հասարակությունը պետք է ընդունակ գտնվի իր վերաբերմունքն արտահայտել կոռումպացված քաղաքական համակարգի նկատմամբ` դրա թե՛ իշխող, թե՛ պայմանականորեն ընդդիմադիր տարրերով հանդերձ. այդպիսի հնարավորություն կարող են տալ թեկուզ 2017թ. ընտրությունները: Այլապես փոփոխություն տեղի չի ունենա»,- նշեց «Առավոտ»-ի զրուցակիցը:
«Առավոտ» օրաթերթ
10.05.2016
