Կառավարության առաջիկա նիստում պաշտպանության նախարարությունը կներկայացնի մի նախագիծ, որով առաջարկում է ՀՀ նախագահի լիազորություններից մի փոքրիկ մաս իր վրա վերցնել:
Մայիսի 12-ի նիստին կառավարության հավանությանն է ներկայացված ՀՀ կառավարության 2008 թվականի N1554-Ն որոշման մեջ փոփոխություն կատարելու մասին որոշման նախագիծը, որով նախատեսվում է ռազմարդյունաբերական պետական կոմիտե նշանակելու ՀՀ նախագահի լիազորությունը փոխանցել պաշտպանության նախարարին:
Նախագծի հիմնավորման մեջ գրված է, որ ՊՆ ռազմաարդյունաբերական վարչության հենքի վրա ստեղծված ռազմարդյունաբերական պետական կոմիտեն ՊՆ-ի աշխատակազմից դուրս առանձնացված ստորաբաժանում է: Կոմիտեի նախագահին ներկայումս նշանակում է ՀՀ Նախագահը: Կառավարության օրակարգում ընդգրկված նախագծի հիմնավորման մեջ նշված է, որ որպես ՀՀ Նախագահի կողմից նշանակվող անձ, կոմիտեի նախագահի պաշտոնը պետք է դասակարգվի հայեցողական կամ քաղաքացիական պաշտոն, որի նպատակով անհրաժեշտ է լինելու համապատասխան լրացում կատարել «Հանրային ծառայության մասին» օրենքում:
Բացի այս, կոմիտեի նախագահի պաշտոնը որպես հայեցողական կամ քաղաքացիական պաշտոն նախատեսելու դեպքում առաջ է գալիս տվյալ պաշտոնի վարձատրության չափի սահմանման հարցը, որի պարագայում պետք է համապատասխան կարգավորում նախատեսվի «Պետական պաշտոններ զբաղեցնող անձանց վարձատրության մասին» օրենքում: Եւ որպեսզի նշված օրենքներում լրացումներ եւ փոփոխություններ կատարելուց խուսափեն, առաջարկվում է սահմանել, որ կոմիտեի նախագահին նշանակում է ՀՀ պաշտպանության նախարարը, ինչը, ըստ ՊՆ-ի, հնարավորություն կտա առանց որեւէ օրենսդրական փոփոխության կոմիտեի նախագահի պաշտոնը նախատեսել որպես քաղաքացիական հատուկ ծառայության պաշտոն:
Կարդացեք նաև
Նելլի ԲԱԲԱՅԱՆ