«Մենք մի բան պետք է հասկանանք՝ կա անմեղության կանխավարկած: Քանի դեռ չի հաստատվել դատական գործերով մարդու մեղավորությունը, այդ մարդն անմեղ է»,- այսօր ԱԺ-ում լրագրողների հետ զրույցում Պանամայի օֆշորային ընկերությունների ցանկում ընդգրկված ՀՀ պաշտոնյաների մասին հարցին ի պատասխան՝ ասաց ԱԺ փոխխոսնակ Էդուարդ Շարմազանովը:
Նա հորդորեց հասարակությանը, լրագրողներին, որ հարգեն իրավաբանության դոկտրինը՝ անմեղության կանխավարկածը. «Բոլոր նրանք, ովքեր խախտել են օրենքը եւ կոռուպցիոն սկանդալների մեջ են, եթե որեւէ մեկին դատարանը կորոշի, որ մեղավոր է՝անկախ նրանից ԱՄՆ քաղաքացի է, թե ՀՀ-ի, պետք է պատժվի: Փաստեր են պետք: Մեր երկրում դատավորների կարիք չկա, բոլորս դատավոր ենք: Առհասարակ եթե կան փաստեր, պետք է ուսումնասիրվեն, իսկ գիտնականը ինչ է արել, ոնց է արել, ես ամեն ինչի պատասխան տվողը չեմ: Ձեր խոնարհ ծառան իրավաբան չի, որ գնահատական տա: Ովքեր կպարզվի, որ կասկածելի գործարքների մեջ է, հանցագործություն է կատարել, անկախ նրանից, դա ես եմ, թե դու՝ պետք է պատժվի»:
Հռիփսիմե ՋԵԲԵՋՅԱՆ
