Թուրքիայի Ազգային մեծ ժողովի (ԹԱՄԺ) արտաքին հարաբերությունների մշտական հանձնաժողովը հայտարարություն է տարածել, որով ԹԱՄԺ-ն իր աջակցությունն է հայտնում Վրաստանի՝ ՆԱՏՕ-ին անդամագրվելու գործընթացին։ Այս մասին հաղորդում է Թուրքիայի խորհրդարանի պաշտոնական կայքը։
ՆԱՏՕ-ին անդամագրվելու համար Վրաստանին սատարող հայտարարությունը ստորագրել են Թուրքիայի ազգային մեծ ժողովի արտաքին հարաբերությունների հանձնաժողովի անդամները։ Ստորագրողների թվում են իշխող «Արդարություն և զարգացում» կուսակցության, ընդդիմադիր «Ժողովրդահանրապետական» և «Ազգայնական շարժում» կուսակցության պատգամավորները, որոնք անդամակցում են վերը նշված հանձնաժողովին։
Հայտարարության մեջ մասնավորապես նշվում է, որ թուրք-վրացական հարաբերությունները ռազմավարական նշանակություն ունեն և կրում են օրինակելի բնույթ։ Տարածված փաստաթղթի մեջ նշվում է նաև, որ Վրաստանը լուրջ նշանակություն ունի Եվրոատլանտյան տարածաշրջանի կայունության և անվտանգության տեսանկյունից. «Հանձնաժողովը գիտակցում է այն որոշումների կարևորությունը, որոնք կընդունվեն 2016թ. հուլիսի 8-9-ը՝ Վարշավայի գագաթնաժողովի ընթացքում։ Հանձնաժողովը ընդգծում է նաև ՆԱՏՕ-Վրաստան հանձնաժողովի կարևորությունը»։
Հայտարարության վերջում նաև նշվում է. «Թուրքիայի Ազգային մեծ ժողովի արտաքին հարաբերությունների հանձնաժողովը վերահաստատում է Վրաստանի անկախությանը, ինքնիշխանությանը, միջազգայնորեն ճանաչված սահմաններին և տարածքային ամբողջականությանը հայտնած իր աջակցությունը»։
Կարդացեք նաև
