Մայիսի 2-4-ը Արգենտինայում և համատեղության կարգով Ուրուգվայում ՀՀ արտակարգ և լիազոր դեսպան Ալեքսան Հարությունյանն աշխատանքային այցով գտնվում էր Ուրուգվայում:
Այցի ընթացքում դեսպան Հարությունյանը հանդիպումներ է ունեցել Ուրուգվայի Արևելյան Հանրապետության փոխնախագահ, Սենատի նախագահ Ռաուլ Սենդիկի, Ներկայացուցիչների պալատի նախագահ Խերարդո Ամարիժայի, արտգործնախարար Ռոդոլֆո Նին Նովոայի, արտգործնախարարի տեղակալ Լուիս Կանսելայի, ինչպես նաև ուրուգվայահայ համայնքային կառույցների ղեկավար կազմի ներկայացուցիչների հետ:
Ուրուգվայի ԱԳ նախարարի հետ հանդիպման ընթացքում, որին մասնակցել է նաև փոխարտգործնախարար Լ. Կանսելան, դեսպան Հարությունյանը, համապարհակ ներկայացնելով ապրիլի 1-2-ին Լեռնային Ղարաբաղի զորքերի շփման գծում Ադրբեջանի կողմից սանձազերծած ագրեսիան և լայնածավալ ռազմական գործողությունները, կարևորել է Ադրբեջանի կողմից 1994 թվականին կնքված զինադադարի խախտման և սանձազերծած ագրեսիայի վերաբերյալ միջազգային հանրության հասցեական արձագանքը և դատապարտումը: Այս կապակցությամբ ԱԳ նախարար Նին Նովոան նշել է, որ իրենց համար ակնհայտ է, թե ով է խախտել զինադադարը, և հավելել, որ հակամարտությունը ռազմական լուծում չունի և անհրաժեշտ է վերադառնալ 1994 թ. զինադադարին:
Զրույցի ընթացքում դեսպան Հարությունյանը տեղեկացրել է, որ 2016 թվականի աշնանը Հայաստանում նախատեսվում է անցկացնել Հայաստան – Լատինական Ամերիկա ֆորում:
Կարդացեք նաև
Ուրուգվայի փոխնախագահ Ռաուլ Սենդիկին նույնպես հանգամանալից ներկայացվել է ԼՂՀ նկատմամբ Ադրբեջանի կողմից իրականացված ագրեսիան, ինչպես նաև ներկայիս իրավիճակը: Քննարկվել են նաև Հայաստան-Ուրուգվայ երկկողմ հարաբերություններին առնչվող հարցեր: Հանդիպումն ընթացել է լիակատար փոխըմբռնման մթնոլորտում:
Այցի ընթացքում դեսպան Ալեքսան Հարությունյանը հանդիպում է ունեցել նաև Ուրուգվայի պետական համալսարանի հայազգի ռեկտոր Ռոբերտո Մարգարյանի հետ: Հանդիպման ընթացքում կարևորվել է Հայաստանի և Ուրուգվայի միջև համալսարանական ոլորտում համագործակցությունը, ինչպես նաև Երևանի պետական համալսարանի և Ուրուգվայի պետական համալսարանի միջև համապատասխան համաձայնագրի կնքումը: Անդրադարձ է կատարվել նաև Ուրուգվայի համալսարանում հայագիտության ամբիոնի հիմնադրման խնդրին:
Ուրուգվայահայ համայնքային կառույցների ղեկավարների հետ հանդիպման ընթացքում անդրադարձ է կատարվել Ադրբեջանի կողմից Արցախի նկատմամբ սանձազերծած ագրեսիային և ներկայիս իրավիճակին: Համայնքային կառույցների ներկայացուցիչները պատրաստակամություն են հայտնել բոլոր միջոցներով սատարել Արցախին:
ՀՀ ԱԳՆ
